სამხრეთ კორეა 2020 წლის ტოკიოს ოლიმპიადაზე მონაწილე თავისი სპორტსმენებისა და დელეგაციის წევრებისათვის საგანგებოდ ამზადებს კვების პროგრამას, რადგან შიშობენ, რომ ღონისძიებაზე მათთვის განკუთვნილი საკვები, შესაძლოა, რადიაციით იყოს დაბინძურებული. ინფორმაციას ამის შესახებ კორეული გამოცემა, Yonhap News Agency ავრცელებს.

ქვეყანაში ღელავენ, რომ მათი დელეგაციის წევრებმა, შესაძლოა, ფუკუშიმას პრეფექტურის ტერიტორიაზე მოყვანილი საკვები მიირთვან. 10 წლის წინ, ამ ტერიტორიაზე მსოფლიოს ერთ-ერთი ყველაზე მძლავრი ბირთვული ელექტროსადგური ცუნამის შედეგად დაზიანდა, რასაც რადიაციის გავრცელებაც მოჰყვა.

იაპონიის ხელისუფლება აცხადებს, რომ ფუკუშიმას პრეფექტურაში მოყვანილი საკვები პროდუქტები უსაფრთხო იქნება, თუმცა, კორეულმა ოლიმპიურმა კომიტეტმა ჯერ კიდევ გასულ წელს დაიჟინა, რომ საკვები პროდუქტების წაღებას სამშობლოდან ამჯობინებენ.

ფოტო: DPA

სამხრეთ კორეამ, როგორც ჩანს, გეგმის განხორციელება უკვე დაიწყო. ოლიმპიურმა კომიტეტმა იაპონიაში უკვე გაგზავნა 14 მზარეული, რომელიც დღეში 420 კერძს მოამზადებს კორეელი ოლიმპიელებისა და დელეგაციის წევრებისათვის. ამასთან, დელეგაცია რამდენიმე პროდუქტს, მაგალითად, კიტრის მწნილს, თავად გაიყოლებს გზად.

მართალია, კორეელების გადაწყვეტილებას საფუძვლად ალბათ "სიფრთხილეს თავი არ სტკივა" უფრო უდევს, ვიდრე მეზობლის მომდურება, თუმცა, იაპონიის მმართველი პარტიის წევრის, მასაჰისა სატოს განცხადებით, სამხრეთ კორეის ოლიმპიური კომიტეტის საქციელი "ფუკუშიმელების ფეხქვეშ გათელვაა".

იაპონელებმა უკმაყოფილება სოციალურ ქსელშიც გამოთქვეს, სადაც სამხრეთ კორეის გადაწყვეტილებას აკრიტიკებენ და მას "გულდასაწყვეტად" და "უხეშობად" აფასებენ.

ამასთან ერთად, იაპონელი ეკონომისტი, ტომოჰისა იშიკავა იმასაც ვარაუდობს, რომ კორეელების საქციელით იაპონური სოფლის მეურნეობის პროდუქციას ჩრდილი მიადგება.

"ფუკუშიმელი ფერმერები დიდ ძალისხმევას სწევენ, რათა უსაფრთხოების სტანდარტები დაიცვან და ალბათ ასეთივე ძალისხმევა უნდა გასწიონ ამ ყველაფრის გასაპროტესტებლად. რეალურად, ჩვენ მაღალი ხარისხის ძალიან ბევრ პროდუქტს ვქმნით", — წერს იშიკავა.

თუმცა, იაპონურ ოლიმპიადაზე კორეელების მონაწილეობის თანმხლები უსიამოვნება მხოლოდ საკვებით არ შემოიფარგლება. ოლიმპიურ სოფელში მცხოვრებ სამხრეთკორეელ სპორტსმენებს ცოტა ხნის წინ აივნებიდან გადმოფენილი პლაკატების ჩამოხსნაც სთხოვეს, რომლებზეც ორ ქვეყანას შორის წარსულში მომხდარი კონფლიქტი იყო მოხსენიებული.