ქართული ოცნების დეპუტატმა, შალვა პაპუაშვილმა ნაციონალური მოძრაობის წევრი, თინა ბოკუჩავა პარლამენტის ტრიბუნიდან ძალის გამოყენებით გამოიყვანა. ბოკუჩავას განცხადებით, პირველად ამის მცდელობა ჰქონდა დეპუტატ ლევან მგალობლიშვილს, რომელსაც შემდეგ შალვა პაპუაშვილი შეუერთდა.

"მხოლოდ იმიტომ, რომ ჩვენ მშვიდობიანად გამოვხატავდით ასეთ პროტესტს, ისინი მოვიდნენ და ფიზიკურად ჯაჯგური დაგვიწყეს, იძალადეს, მათ შორის, ქალებზე. სრულიად სამარცხვინოდ, ორი ლაჩარი დეპუტატად წოდებული, ბატონი ლევან მგალობლიშვილი, რომელსაც საზოგადოება არ იცნობს, რადგან დიდი ორატორული ნიჭით, ფაქტია, არ გამოირჩევა, მაგრამ მუშტი-კრივით ქალების წინააღმდეგ, როგორც ჩანს გამოირჩევა, იმიტომ, რომ პირველმა მან აღმართა ხელი ჩემზე და შემდეგ მას შეუერთდა ბატონი შალვა პაპუაშვილი", — განაცხადა ბოკუჩავამ.

დღეს პარლამენტში შინაგან საქმეთა მინისტრი, ვახტანგ გომელაური მივიდა. მას მედიისა და ოპოზიციის წარმომადგენლები პროტესტით დახვდნენ. მინისტრის სიტყვით გამოსვლის დაწყებისთანავე ჟურნალისტებმა პლენარული სხდომის დარბაზში გადმოფინეს ბანერი წარწერით — "დასაჯეთ მოძალადეები".

პარალელურად, ოპოზიციონერმა დეპუტატებმა გომელაურს სიტყვა შეაწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გაშალეს.