მოძრაობა სირცხვილია პრემიერმინისტრს, ირაკლი ღრიბაშვილს მიმართავს და აცხადებს, რომ ის ან საკუთრი ნებით გადადგება, ან ამ ქვეყნის ადამიანებისა და თავისუფლების მოყვარე ხალხი გადააგდებს.

"თავად განაცხადე 5 ივლისს, დაძაბულობა იქნებაო და როდიდან აღკვეთთ დაძაბულობას 1 საპატრულო ეკიპაჟითა და შეუიარაღებელი პოლიციელებით? თქვენს პოლიციელებს თვალებში წიწაკის სპრეის ასხამდნენ მოძალადეები და თქვენი საპატრულო პოლიციის უფროსს, ვაჟა სირაძეს, ფეხებში უფეთქებდნენ ასაფეთქებლებს, არმატურის ნაგლეჯებსა და ლოდებს ისროდნენ და თქვენ ისევ გიბრუნდებათ ენა, რომ ყველაფერი მედიასა და სამოქალაქო აქტივისტებს გადააბრალოთ.

ირაკლი ღარიბაშვილო, მორჩი სხვების კუნთებზე ყურებას, რადგან შენ მხოლოდ არასრულწლოვან ბავშვებთან გაქვს დიდი გული, ისიც მაშინ, როდესაც შენი მფლობელის შვილი მოგიწოდებს.

სათამაშო ხარ, მარიონეტი, სამარცხვინო და სულელიც. შენ გადადგები საკუთარი ნებით, ან ამ ქვეყნის თავისუფლებისა და ადამიანების მოყვარე ხალხი გადაგაგდებთ", — აცხადებს სირცხვილია.

მათი თქმით, ღრიბაშვილი საპატრიარქოსთან კოორდინირებით 5 ივლისს ძალადობის პირველი და ყველაზე დიდი გავლენის მქონე წამხალისებელია.

"ჩვენ გვყავს ე.წ. ქურდული მენტალიტეტის მქონე, მკვლელი, ჰომოფობი და უღირსი პრემიერმინისტრი. ბიძინა ივანიშვილის პირდაპირი მითითებების ძალადობრივად შემსრულებელი, რომელიც ძალაუფლების ტკბობაში ისეთ ფსკერზე დაეშვა, რომ მისი ყველა სიტყვა უკიდურესად სამარცხვინო და დანაშაულის შემცველია.

ირაკლი ღარიბაშვილი, საპატრიარქოსთან კოორდინირებით, არის 5 ივლისს ძალადობის პირველი და ყველაზე დიდი გავლენის მქონე წამხალისებელი. ის არის პასუხისმგებელი ყველა დაღვრილ სისხლზე, ლექსო ლაშქარავას მკვლელობაზე.

ირაკლი ღარიბაშვილი მისნაირივე ბინძური მეთოდებით ებრძვის ამ ქვეყნის დემოკრატიულ და დასავლურ კურსს, ის არც კი ცდილობს, დამალოს თავისი ძალადობრივი მიდრეკილებები და სჯერა, რომ მის ერთ სიტყვას ამ ქვეყანაში ყველა დაემორჩილება", — ამბობენ ისინი.

პრემიერმინისტრმა, ირაკლი ღარიბაშვილმა დღეს, 12 ივლისს გამართულ ბრიფინგზე თქვა, რომ 5 ივლისს, ძალადობრივ კონტრაქციაზე სასტიკად ნაცემი ჟურნალისტის, ლექსო ლაშქარავას გარდაცვალება სცადეს გამოეყენებინათ პოლიტიკური მიზნებისთვის.

გუშინ 11 ივლისს მედიის წარმომადგენლებმა ერთობლივი აქცია გამართეს. მათ გააპროტესტეს ჟურნალისტებზე ძალადობა და 5 ივლისს ნაცემი TV პირველის ოპერატორის გარდაცვალების გამო მთავრობას პასუხისმგებლობის აღება მოსთხოვეს. აქციის მთავარი მოთხოვნები იყო პრემიერმინისტრისა და შინაგან საქმეთა მინისტრის გადადგომა და დამნაშავეების დასჯა.

• არ გავაშუქებ არაფერს, ლექსოს სიკვდილის გარდა, ჩვენ მივიყვანთ ამ საქმეს ბოლომდე — გრიგოლია
• მიშველაძე: სამღვდელოებავ, ვინც მოუწოდებდით ძალადობისკენ, გაიკრიჭეთ წვერი და წადით!
• ვითხოვთ მყისიერ რეაგირებას — მედია დიპლომატიურ კორპუსს მიმართავს

აქცია რამდენიმე ლოკაციაზე გაიმართა, ქართული ოცნების ოფისთან, პარლამენტთან, კანცელარიასთან. აქტივისტებმა პერფორმანსის სახით წითელი საღებავი შეასხეს კანცელარიისა და საპატრიარქოს კედლებს. ორივე დაწესებულებაში მალევე სცადეს პროტესტის ნიშნად შესხმული საღებავის წაშლა. ყველგან მობილიზებული იყვნენ დიდი ოდენობით სამართალდამცავები.

აქციის მონაწილეთა მოთხოვნას იზიარებდა არაერთი არასამთავრობო ორგანიზაციაც, რომლებმაც განცხადებები გაავრცელეს და აღნიშნეს, რომ პრემიერი უნდა გადადგეს.

• პრემიერმა თანამდებობა დაუყოვნებლივ უნდა დატოვოს — 19 არასამთავრობო
• კოალიცია მედიის ადვოკატირებისთვის: პრემიერმინისტრმა და შს მინისტრმა დაუყოვნებლივ დატოვონ თანამდებობა
• ორგანიზებული, წახალისებული, მიზანმიმართული ძალადობის მსხვერპლი — ლომჯარია გარდაცვლილ ოპერატორზე

კონკრეტულად პრემიერის არა, თუმცა დამნაშავეების დასჯის აუცილებლობაზე ისაუბრა პრეზიდენტმაც. ის პირველი იყო სახელისუფლებო რგოლიდან, ვინც ოპერატორის გარდაცვალების ამბავს გამოეხმაურა.

აქციის მონაწილეებმა ულტიმატუმი წამოუყენეს ხელისუფლებას და მოთხოვნების შესასრულებლად ვადა დღემდე, 12 ივლისამდე მისცეს. ჯერ კიდევ გუშინ ქართული ოცნების წარმომადგენლებმა განაცხადეს, რომ ღარიბაშვილი გადადგომას არ აპირებდა, რაც დღეს პრემიერმაც დაადასტურა.

რაც შეეხება ოპერატორის გარდაცვალების საქმეს, დაწყებულია გამოძიება. გუშინ შსს-მ ორი საგანგებო ბრიფინგი ჩანიშნა და ორივეთი მიანიშნა, რომ გარდაცვლილი შესაძლოა არაფხიზელ მდგომარეობაში ან ნარკოტიკული თრობის ქვეშ იყო. ეს ვერსია აქტიურად ვითარდებოდა სოციალურ ქსელში პროსახელისუფლებო ტროლგვერდებზეც, რომლებიც მედიისა და გარდაცვლილის დისკრედიტაციას ეწეოდნენ.

პროტესტის მიზეზი გახდა ისიც, რომ ცხედარი ექსპერტიზაზე ოჯახის ნების საწინააღდეგოდ გადაიტანეს. როგორც დედა ამბობს, ცხედარს იყო გადაფარებული, თუმცა ხელიდან გამოგლიჯეს. პოლიციელებმა პარკში გახვეული ცხედარი სწრაფი ტემპით ჯერ ლიფტში შეიტანეს, ტექნიკური ხარვეზის გამო კი ცხედრით კიბეებზე ჩამოირბინეს. სუბარის ვარაუდით, ცხედარი ექსპერტიზაზე სწრაფად იმიტომ წაიღეს, რომ წინააღმდეგობა აერიდებინათ. საიას ხელმძღვანელი აცხადებს, რომ ბევრ კითხვას ბადებს, რა გააკეთეს ან არ გააკეთეს საგამოძიებო ორგანოებმა ექსპერტიზაზე ადვოკატის მისვლამდე.

ალექსანდრე ლაშქარავა 11 ივლისს დედამ სახლში გარდაცვლილი იპოვა. იგი ერთ-ერთია იმ ათობით მედიის წარმომადგენელს შორის, რომელსაც 5 ივლისს ძალადობრივი კონტრაქციის მონაწილეები ფიზიკურად გაუსწორდნენ. ცემის შედეგად მას ჰქონდა სახის ძვლების მოტეხილობა თვალის გარშემო, ტვინის შერყევა და დაჟეჟილობები. იგი რამდენიმე დღე საავადმყოფოში იმყოფებოდა და 10 ივლისს სახლში გაეწერა.

ალექსანდრე ლაშქარავასა და ჟურნალისტ მირანდა ბაღათურიას ძალადობრივი კონტრაქციის მონაწილეები თავს მოძრაობა სირცხვილიას ოფისში შეჭრის მცდელობისას დაესხნენ. ლაშქარავა ჯერ კიდევ საავადმყოფოში იმყოფებოდა, როცა On.ge-ს შემთხვევის დეტალები მოუყვა.

"უბრალოდ კიბეზე შეგვეფეთნენ, ჟურნალისტზე გაიწიეს ჯერ და შემდეგ ჩამქოლეს. არ ვიცი, 50 კაცი მირტყამდა, მთელი კიბის საფეხური, ზედა ნაწილი, ქვედა ნაწილი. რაღაც ნაწილი ავიდა ზევით, დავიწყე გაყოლა. რამდენიმე სართულზე იყვნენ ესენი, რამდენიმე სართულმა მცემა. ჩამაგდეს, ქვევით გადამაგდეს და ისე მცემეს, ტექნიკა დააქუცმაცეს, არ ვიცი, ასეთი შთაბეჭდილება მრჩება, რომ უნდოდათ მედია გამოეყვანათ მწყობრიდან [...]

ახლა მე მეძახიან ამოცნობაზე მოდიო, მაგრამ ორი დღე კიდევ აქ უნდა ვიყო, ვერ გავდივარ და იდენტიფიცირება წარმოუდგენელია მოვახდინო, იმიტომ, რომ 50-60 ადამიანი იყო", — ყვებოდა ლაშქარავა 6 ივლისს, თავდასხმიდან მეორე დღეს.

აღსანიშნავია, რომ ამ დრომდე დაკავებულები არ არიან ძალადობრივი აქციის ორგანიზატორები.