მთავრობის ადმინისტრაციის ყოფილი ხელმძღვანელი და პარტია საქართველოსთვის წევრი, ნათია მეზვრიშვილი აქციებთან დაკავშირებით ამბობს, რომ გიორგი გახარიას შინაგან საქმეთა მინისტრობის დროს ეს საკითხი 48 საათი არ გაგრძელდებოდა და მოგვარებული იქნებოდა.

"პირდაპირ გეტყვით, გიორგი გახარიას ყოველთვის ჰქონდა იმის გამბედაობა და უნარი, რომ როდესაც არაპოპულარული გადაწყვეტილების მიღება იყო საჭირო, გამოსულიყო და ეს საზოგადოებისთვის ეთქვა, რაც არ უნდა მოსაწონი ყოფილიყო ეს ან არ ყოფილიყო. ამ ხელისუფლებამ იცოდა, რომ ამ დაპირისპირების თავიდან არიდების არც რესურსი ჰქონდა, არც უნარი ჰქონდა და იმის ნაცვლად, რომ გამოსულიყო, ეს გულწრფელად ეთქვა და ხისტი გადაწყვეტილებები მიეღო. ამის ნაცვლად დაუშვა ის, რაც დაუშვა და ახლა ამის მოგვარების უნარი არ აქვს. ხან უკაცრავად და ხალხს ჰკიდებს ამ ტვირთს და ამ პასუხისმგებლობას, რომ თითქოს საზოგადოება ძალადობას ამართლებს და ეს არის საზოგადოების უმრავლესობის დაკვეთა, ხან ვერ ხვდება რას აკეთებს, ეკლესიას ჰკიდებს პასუხისმგებლობას, რომ ეკლესია ამართლებს თითქოს. ანუ, ვერ ხვდება, რამდენად დიდ ზიანს აყენებს თავისი ვიწრო პოლიტიკური ინტერესებიდან გამომდინარე სახელმწიფოსაც, საზოგადოებასაც, ინსტიტუტებსაც და აბსოლუტურად ყველა ინსტიტუციას, რომელსაც მითითება აქვს მიცემული, რომ უბრალოდ, არ გაინძრეს... ბოლო 48 საათის განმავლობაში ქუჩაში დღისით, მზისით, მოქალაქეებს, ბავშვებს, ჟურნალისტებს თავს ესხმიან, შენობებში იჭრებიან, აზიანებენ სხვადასხვა ნივთებს, ასეთი რამე გახსენდებათ აი იმ მოვლენების დროს რაზეც მეკითხებით? — ვერ გაიხსენებთ! გამოხატვის თავისუფლების სრულად რეალიზების უფლება მაშინ ადამიანებს მიეცათ თუ არა, ეს სამსჯელო და საკამათო საკითხია, მაგრამ ძალადობაზე როცა ვსაუბრობთ, ვერ გაიხსენებთ ასეთს, ახლა რაც ხდება — განუკითხაობა, რომლის მოგვარების უნარი არაა — დარწმუნებით შემიძლია გითხრათ, რომ ეს საკითხი 48 საათი არ გაგრძელდებოდა და მოგვარებული იქნებოდა", — თქვა მთავრობის ადმინისტრაციის ყოფილმა ხელმძღვანელმა.

მისივე თქმით, ხელისუფლებას არ აქვს იმის უნარი, რომ დაპირისპირება განმუხტოს და ფაქტობრივად ყველაფერი გააკეთა იმისთვის, რომ დაპირისპირება კიდევ უფრო გაღვივებულიყო.

"ამ ხელისუფლებას იმის უნარი არ აქვს, რომ დაპირისპირება განმუხტოს — ფაქტიურად ყველაფერი გააკეთა რომ დაპირისპირება კიდევ უფრო გაღვივებულიყო. მას შეეძლო მარტივი რამ გაეკეთებინა — საკუთარ თავზე აეღო ღონისძიების არ ჩატარებაზე პასუხისმგებლობა და შემდეგ დასავლელ პარტნიორებთან ამის პოლიტიკური ფასიც გადაეხადა. მაგრამ იმის გამო, რომ ხელისუფლებას ასეთი ხისტი გადაწყვეტილების მისაღებად არც გამბედაობა ეყო, არც კვალიფიკაცია და არც უნარი - მთელი ეს პასუხისმგებლობა გადაიტანა ხალხზე. და ეს გახლავთ რეალობა. მე მინდა საზოგადოებას მივმართო, რომ ვერ არის ეს ხელისუფლება ამ დაპირისპირების განმმუხტავი", — ამბობს მეზვრიშვილი.

ჰომოფობიური და ძალადობრივი ჯგუფების თავდასხმის შედეგად 5-6 ივლისს 50-ზე მეტი ჟურნალისტი დაშავდა. 5 ივლისს დღის განმავლობაში პოლიციას არავინ დაუკავებია. კონტრაქციაზე მობილიზებული იყო არასაკმარისი სამართალდამცავი და პოლიციელებს ტერიტორიიდან გაჰყავდათ არა მოძალადეები, არამედ ჟურნალისტები. დღის ბოლოს შსს-მ თქვა, რომ დაკავებული იყო მხოლოდ 8 პირი და ყველა მათგანი ადმინისტრაციული წესით. 6 ივლისს ცნობილი გახდა სამი ადამიანის დაკავების შესახებ, ხოლო 7 ივლისს კიდევ 4 ადამიანი დააკავეს. მათ ედავებიან სისხლის სამართლის კოდექსით გათვალისწინებულ დანაშაულებს: ძალადობასა და ჟურნალისტის საქმიანობაში ხელის შეშლას.

6 ივლისის აქციაზე პოლიცია მოძალადეებს აქტიურად აკავებდა, თუმცა ისინი მშვიდობიანი აქციის მიმართულებით კვერცხებს, ქვებს, ქვებით სავსე ბოთლებს, რკინის ნაჭრებს, შუშებს და სხვა ნივთებს ისროდნენ. დაშავებულია რამდენიმე პოლიციელიც. ჯამში 6 ივლისის ღამეს შსს-მ ადმინისტრაციული წესით 100 ადამიანი დააკავა, დილით 68 ხელწერილის საფუძველზე გაათავისუფლეს, 32 კი დროებითი მოთავსების იზოლატორში რჩება.

ძალადობრივი აქციები თბილისი პრაიდის მიერ დაანონსებული ღირსების მარშის წინააღმდეგ ჩატარდა. 5 ივლისს დაგეგმილი ღირსების მარში ვერ შედგა, თუმცა, მეორე დღეს, ჟურნალისტებზე ძალადობის დასაგმობად მოქალაქეები მდუმარე აქციაზე შეიკრიბნენ. მათ შეუერთდნენ პრაიდის ორგანიზატორებიც, რომლებმაც ლგბტ დროშა გაშალეს და ფერადი კვამლი გაუშვეს. პრაიდი ჯებირებს მიღმა მობილიზებული ძალადობრივი ჯგუფების გინებისა და მუქარების ფონზე მაინც შედგა. აქციის დასრულების შემდეგ პრაიდის წევრებმა და ჟურნალისტებმა ტერიტორია პოლიციის დახმარებით დატოვეს.

გაიგე მეტი:

• მეუფე იაკობი ჟურნალისტებზე თავდასხმაზე პასუხისმგებლობას არ გრძნობს
• ჟურნალისტებმა ეს ამბავი მსოფლიოს უნდა გააცნოთ — სპაიკ ლი თბილისში განვითარებულ მოვლენებზე
• რა ხდებოდა რუსთაველის გამზირზე — ფოტორეპორტაჟი
• პოლიციამ რუსთაველის გამზირიდან ჟურნალისტები და აქტივისტებიც გაიყვანა, ძალადობრივი ჯგუფები კი პარლამენტთან მიუშვა
• ძალადობრივმა ჯგუფებმა ევროკავშირის დროშა ჩამოხსნეს