5 ივლისს თბილისში განვითარებულ მოვლენებს გამოეხმაურა ოსკაროსანი კინორეჟისორი და პროდიუსერი სპაიკ ლი. ამერიკელ კინოხელოვანს, რომელიც კანის წლევანდელი ფესტივალის ჟიურის ხელმძღვანელია, პრესკონფერენციაზე შეკითხვა ქართული მედიაპლატფორმა Movement-ის ჟურნალისტმა, ანანო ბაკურაძემ, დაუსვა.

ბაკურაძემ შეკითხვა თბილისში ძალადობრივი ჯგუფების მიერ ჩადენილი ქმედებების მოკლე მიმოხილვის შემდეგ დასვა და ლის მისი, როგორც აქტივისტის, გამოცდილების გაზიარება სთხოვა აღნიშნულ საკითხებთან, მათ შორის უსამართლობასა და რუსეთთან გამკლავებასთან, დაკავშირებით.

ლიმ ქართველ ჟურნალისტს ინფორმაციის მიწოდებისთვის მადლობა გადაუხადა და საკონფერენციო დარბაზში მყოფ ჟურნალისტებს მისი გავრცელებისკენ მოუწოდა.

"მინდა, მადლობა გადაგიხადოთ ინფორმაციის გაჟღერებისთვის. მგონი, ერთადერთი არ ვარ, ვინც საქართველოში არსებული ამ სიტუაციის შესახებ არ იცოდა. ამ მსოფლიოს განგსტერები მართავენ. 'ნარინჯისფერი აგენტი', ის ტიპი ბრაზილიაში და პუტინი. ესაა. ისინი განგსტერები არიან, იმას გააკეთებენ, რაც უნდათ; არც მორალი აქვთ და არც სინდისი. აი, ამ სამყაროში ვცხოვრობთ, ჩვენ კი ასეთი განგსტერების წინააღმდეგ ხმა უნდა ავიმაღლოთ. კიდევ ერთხელ ვიმეორებ, საქართველოში არსებული ასეთი შემზარავი სიტუაციის შესახებ არ ვიცოდი. ასე რომ, მადლობას გიხდით, რომ ეს ინფორმაცია მსოფლიო მედიის წარმომადგენლებს გაუზიარეთ. ახლა კი, აქ მყოფმა ჟურნალისტებმა ეს ამბავი მსოფლიოს უნდა გააცნოთ. ხომ მოისმინეთ — ახლა გამოიკვლიეთ და დაწერეთ ამის შესახებ. კრიტიკა მხოლოდ ფილმებზე კი არა, მსოფლიოს განგსტერებზეც უნდა წეროთ".

ფოტო: Getty

მოგვიანებით, შეკითხვას გამოეხმაურა კინოფესტივალის ჟიურის წევრი, ამერიკელი მსახიობი მეგი ჯილენჰოლიც.

"მგონი, საკმარის ინფორმაციას არ ვფლობ, რომ აქტივიზმზე რაიმე სახის რჩევა მივცე ქართველ აქტივისტსა და ჟურნალისტს, თუმცა, მსურს, თქვენს შეკითხვაზე ვიფიქრო. მოხარული ვიქნები, თუკი რამდენიმე დღეში გაგესაუბრებით და ცოტათი უფრო მეტს შევიტყობ. მე ვიტყოდი, კინო ძალიან ხშირად არსებითად პოლიტიკური იყო — არაპოლიტკორექტულად კი არა, არამედ ემოციურად".

ფოტო: Valéry Hache / AFP / Getty

კანის 2021 წლის კინოფესტივალი 6 ივლისს დაიწყო და 17 ივლისამდე გაგრძელდება. მასშტაბური ღონისძიება პანდემიის გამო აღებული ორწლიანი პაუზისა და რამდენიმეჯერ გადადებული თარიღების შემდეგ, წელს პირველად იმართება.