3 მარტს, ღამით, თბილისში, ლეონიძის (თავისუფლების მოედნის მიმდებარე ტერიტორია) ქუჩაზე ტრანსგენდერ ქალსა და გეი მამაკაცს სიტყვიერი შეურაცხყოფა მიაყენეს და ვარცხნილობის გამო მათ დისკრიმინაციას ახდენდნენ. ამის შესახებ On.ge-ს ლგბტ საკითხებზე მომუშავე ორგანიზაციის - თემიდას აღმასრულებელმა დირექტორმა, კობა ბიწაძემ განუცხადა.

მისი მონაყოლიდან ირკვევა, რომ დაახლოებით 23:30 საათზე ლეონიძის ქუჩაზე ტრანსგენდერ ქალსა და გეი მამაკაცს ორმა უცნობმა პირმა ფული სთხოვა. მას შემდეგ კი, რაც ფულის მიცემაზე უარი უთხრეს მათ მიმართ, ჰომოფობიური ნიადაგზე, სიტყვიერი შეურაცხყოფის მიყენება დაიწყეს.

"ერთ-ერთი თავდამსხმელი ცდილობდა ფიზიკურ თავდასხმაზე გადასვლას და დააპირა ტელეფონი ესროლა მათი მიმართულებით. თუმცა, თანმხლებმა პირმა ხელი ჩააწევინა," - ამბობს ბიწაძე.

მისი თქმით, ერთ-ერთმა დაზარალებულმა გამოიძახა პოლიცია, რომელიც დაახლოებით 5 წუთში მოვიდა ადგილზე, თუმცა თავდამსხმელები უკვე წასული იყვნენ. მოგვიანებით, როცა პოლიციის თანამშრომელი მოხსენებით ბარათს წერდა, ქუჩაზე იმ პირმა გაიარა, რომელსაც ლგბტ პირები შეურაცხყოფის მიყენებაში ადანაშაულებდნენ. პოლიციამ ის ადგილზე დააკავა. რამდენიმე წუთის გასვლის შემდეგ ლგბტ პირებთან, მათი თქმით, მეორე თავდამსხმელიც მივიდა.

"პოლიციის მოსვლამდე თავდამსხმელი ერთ-ერთ დაზარალებულს ესაუბრა და სთხოვდა მასთან ერთად გასვლას. თუმცა, ამაზე უარი მიიღო და დაუწყო კითხვების დასმა. ეკითხებოდა თუ ჰქონდა მასთან რაიმე პრობლემა. შემდეგ საუბარი დაიწყო იმაზე, რომ ნასამართლევია, 12 წელი იჯდა ციხეში და პირობითი აქვს. ამის შემდეგ მოვიდა პოლიცია და ისიც გადაიყვანეს განყოფილებაში," - აღნიშნავს ბიწაძე.

შსს-ს პრესსამსახურში ვინმეს დაკავებას არ ადასტურებენ და აღნიშნავენ, რომ მომავალში რაიმე სამართლებრივი რეაგირება არ იგეგმება.

"შემოვიდა შეტყობინება სიტყვიერ შელაპარაკებაზე, გასული იყო პოლიციის ჯგუფი. პოლიციაში წარმოდგენილი იყო ორივე მხარის წარმომდგენელი. მათ თქვეს, რომ სიტყვიერი შეურაცხყოფა მიაყენეს და სხვა პრეტენზიები არ იყო, გაფორმდა ოქმები და ბოდიში მოიხადეს... მათ პრეტენზია აღარ ჰქონდათ, იმათ ბოდიში მოუხადეს... ანუ ერთმანეთში გაირკვა," - აღნიშნავენ შსს-ს პრესსამსახურში.

საქართველოში დისკრიმინაციის ყველა ფორმის აღმოფხვრის შესახებ კანონი 2014 წელს მიიღეს. ამ კანონის მიზანია დისკრიმინაციის აღმოფხვრა, მათ შორის, სექსუალური ორიენტაციისა და გენდერული იდენტობის მიუხედავად. ამავე კანონის მიხედვით, საქართველოში აკრძალულია ნებისმიერი სახის დისკრიმინაცია.