ამერიკელი დემოკრატი სენატორი ჯინ შაჰინის "ქართული ოცნების" მიერ "მაუწყებლობის შესახებ კანონის" დამოუკიდებელი ტელეკომპანიების — "პირველის", "ფორმულას" და "მთავარის" წინააღმდეგ გამოყენებასთან დაკავშირებით განცხადებას ავრცელებს.

მისი თქმით, "ქართული ოცნების" დაუღალავი მცდელობა ხელი შეუშალოს სიმართლის გავრცელებას დემოკრატიაზე თავდასხმაა".

"დამოუკიდებელი მედია ნებისმიერი დემოკრატიის ქვაკუთხედია. როდესაც "ქართული ოცნების" მთავრობამ "მაუწყებლობის შესახებ" კანონში ცვლილებები შეიტანა, მან სერიოზული შეშფოთება გამოიწვია, რომ კანონი დამოუკიდებელი ქართული ხმების წინააღმდეგ იარაღად გამოიყენებოდა. ახლა, როდესაც "ქართულმა ოცნებამ" დამოუკიდებელი მედიის წინააღმდეგ სარჩელები შეიტანა "კომუნიკაციების ეროვნულ კომისიაში", რომლის დამოუკიდებლობაც თავისთავად კითხვის ნიშნის ქვეშ დგას, ცხადია, რომ ეს მედია საშუალებები არ შეფასდება ჟურნალისტური სტანდარტებით, ისინი სამიზნე გახდებიან პოლიტიკური მიზეზების გამო. "ქართული ოცნების" დაუღალავი მცდელობა ხელი შეუშალოს სიმართლის გავრცელებას, დემოკრატიაზე თავდასხმაა. ამიტომ მოვუწოდე სენატს, მიიღოს ჩვენი ორპარტიული "MEGOBARI აქტი", რადგან ეს ნიშნავს "ქართული ოცნების" პასუხისგებაში მიცემას პრესის თავისუფლებისა და დემოკრატიულ ინსტიტუტებზე თავდასხმებისთვის.

წელს, სენატის საგარეო ურთიერთობათა კომიტეტის თავმჯდომარემ, სენატორმა რიშმა (რესპუბლიკელი, აიდაჰო) წარადგინა "MEGOBARI აქტი" — "საქართველოს ანგარიშვალდებულების, მდგრადობისა და დამოუკიდებლობის განმტკიცების შესაძლებლობების მობილიზაციისა და გაძლიერების შესახებ". ეს ორპარტიული კანონპროექტი მხარს უჭერს საქართველოს ხალხს, რადგან მათი მთავრობა აგრძელებს ძალადობრივ თავდასხმებს მშვიდობიან მომიტინგეებზე და კიდევ ერთხელ ადასტურებს აშშ-ის მხარდაჭერას საქართველოს ევროატლანტიკური ინტეგრაციის მიმართ", — ნათქვამია სენატის საგარეო კომიტეტის ვებგვერდზე გავრცელებულ ინფორმაციაში.

მეტი "MEGOBARI აქტის" შესახებ: