საქსტატმა პირდაპირი უცხოური ინვესტიციების მონაცემები გამოაქვეყნა, რომლის მიხედვითაც, საქართველოში პირველ კვარტალში 125,4 მილიონი დოლარის ინვესტიცია შემოვიდა, რაც გასული წლის იმავე პერიოდთან შედარებით 28,3%-ით ნაკლებია.

ქვეყნების მიხედვით, საიდანაც ყველაზე მეტი ინვესტიცია შემოვიდა, კვლავ პირველ ადგილზეა გაერთიანებული სამეფო — 88,4 მილიონი დოლარით, რაც მთლიანი პირდაპირი უცხოური ინვესტიციების 70,5%-ს შეადგენს — სავარაუდოდ, ეს იმით არის გამოწვეული, რომ ქვეყანაში მოქმედი რამდენიმე ქართული საფინანსო კომპანია (საქართველოს ბანკი, თიბისი ბანკი, "საქართველოს კაპიტალი") დიდ ბრიტანეთში, ლონდონის საფონდო ბირჟაზე არიან წარმოდგენილნი, შესაბამისად, მათ მიერ საქართველოში ჩადებული თანხები უცხოურ ინვესტიციებად განიხილება. ქვეყნებს შორის, მეორე ადგილზე იმყოფება რუსეთი — 31,9 მილიონი დოლარით (25,4%), ხოლო მესამეზეა თურქეთი — 24,5 მილიონი დოლარით (19,5%).

10 ქვეყანა, საიდანაც საქართველოში 2021 წლის იანვარ-მარტში ყველაზე მეტი ინვესტიცია შემოვიდა:

  1. გაერთიანებული სამეფო — 88 მილიონი დოლარი; ზრდა წინა წლის შესაბამის პერიოდთან — 21%;
  2. რუსეთი — 32 მილიონი დოლარი; ზრდა — 186%;
  3. თურქეთი — 25 მილიონი დოლარი; ზრდა — 95%;
  4. ჩეხეთი — 14 მილიონი დოლარი; კლება — 574%;
  5. არაბთა გაერთიანებული საამიროები — 13 მილიონი დოლარი; კლება — 1 699%;
  6. დანია — 11 მილიონი დოლარი; კლება — 9%;
  7. გერმანია — 10 მილიონი დოლარი; ზრდა — 259%;
  8. იაპონია — 7 მილიონი დოლარი; კლება — 7%;
  9. მარშალის კ-ები — 7 მილიონი დოლარი; კლება — 24%;
  10. ნიდერლანდი — 6 მილიონი დოლარი; კლება — 61%;

აღსანიშნავია, რომ მიმდინარე წლის პირველ კვარტალში ინვესტიციების გადინება ყველაზე დიდი მოცულობით (-59,8 მილიონი დოლარი) აშშ-ის, ყირგიზეთისა (-24,3 მილიონი დოლარი) და მალტას (-12 მილიონი დოლარი) შემთხვევაში დაფიქსირდა.

შეგახსენებთ, რომ პანდემიის პერიოდში უცხოური ინვესტიციები მასშტაბურად შემცირდა. 2020 წელს პირდაპირმა უცხოურმა ინვესტიციებმა წლიურად 52,9%-ით იკლო და ბოლო 10 წლის მინიმუმამდე, 616,9 მილიონ დოლარამდე დაეცა.