საქართველოს პრეზიდენტი ბელარუსის რესპუბლიკაში ოფიციალური ვიზიტით იმყოფება. დღეს გიორგი მარგველაშვილი ბელარუსის პრეზიდენტს ალექსანდრე ლუკაშენკოს პირისპირ შეხვდა.

პრეზიდენტის ადმინისტრაციის ინფორმაციით, საუბრის ერთ-ერთი მთავარი თემა რეგიონული უსაფრთხოების საკითხები იყო.

მარგველაშვილის განცხადებით, ე.წ. ინტეგრაციის შესახებ ხელშეკრულებების განხორციელებით, რუსეთის ფედერაციამ დაიწყო აფხაზეთისა და ცხინვალის რეგიონების ფაქტობრივი ოკუპაციის პროცესი:

"ცხინვალის რეგიონის რუსეთის ფედერაციის შემადგენლობაში შესვლის შესახებ დაანონსებული რეფერენდუმის ჩატარებას, მნიშვნელოვანი უარყოფითი შედეგები ექნება არა მხოლოდ საქართველოს,არამედ მთელი რეგიონის უსაფრთხოებისათვის".

საქართველოსა და ბელარუსის პრეზიდენტები მინსკში ერთმანეთს შეხვდნენ.

ფოტო: საქართველოს პრეზიდენტის ადმინისტრაცია

პრეზიდენტმა მარგველაშვილმა ხაზგასმით აღნიშნა, რომ საქართველოს ოკუპირებული რეგიონების უკანონო ანექსიის თავიდან აცილების მიზნით, უკიდურესად მნიშვნელოვანია საერთაშორისო თანამეგობრობის მტკიცე პოზიცია რუსეთის უკანონო ქმედებებთან დაკავშირებით.

საქართველოს პრეზიდენტმა შეშფოთება გამოთქვა იმასთან დაკავშირებით, რომ აფხაზეთის და ცხინვალის რეგიონი კვლავ მიუწვდომელი რჩება საერთაშორისო თანამეგობრობისათვის და ევროკავშირის სადამკვირვებლო მისია წარმოადგენს ერთადერთ საერთაშორისო მექანიზმს ადგილზე, რომელსაც მიუხედავად მისი მანდატისა, ოკუპირებულ რეგიონებში შესვლის უფლებას არ აძლევენ. მისი თქმით, ეს კიდევ უფრო ამძიმებს იქ არსებულ მდგომარეობას ადამიანის უფლებათა მიმართულებით.

შეხვედრაზე განიხილეს ორ ქვეყანას შორის ეკონომიკური და სავაჭრო ურთიერთობების მზარდი დინამიკა.

გიორგი მარგველაშვილის განცხადებით, ქართული მხარე მზადყოფნას გამოთქვამს ბელარუს კოლეგებს გაუზიაროს საკუთარი გამოცდილება ეკონომიკური რეფორმების, ასევე ელექტრონული მმართველობისა და კორუფციასთან ბრძოლის მიმართულებებით.