"ირაკლი კობახიძემ თავისი ბოლშევიკური ბრიფინგები და გამონათქვამები სჯობს რომ შეინახოს თავისთვის, ეს არ წაადგება მას არც პერსონალურად, არც მის გუნდს", — ასე პასუხობს ნაციონალური მოძრაობის დეპუტატი თინა ბოკუჩავა ქართული ოცნების თავმჯდომარეს. კობახიძემ დღეს განაცხადა, რომ თუ ენმ შეთანხმების დოკუმენტს ხელს არ მოაწერს, მკაცრი რეაგირება ექნებათ.

მისი თქმით, პარტიის პოლიტიკურ გემგებზე და იმაზე, თუ როგორ ხედავენ თავიანთ ფუნქციას ამ მოწვევის პარლამენტში, პარტიის თავმჯდომარე, ნიკა მელია ისაუბრებს.

"ამნისტიის კანონპროექტის განხილვა გადადეს, სავარაუდოდ იმიტომ, რომ ძალიან შეეშინდა ბატონ ოხანაშვილს, რომ ნიკა მელიას პირველი გამოსვლა პლენარულ სხდომაზე იქნებოდა სწორედ ამნისტიის კანონზე. გასაგებია ეს ყველაფერი, რომ ფორმალურად უმრავლესობაში არიან და ამიტომ გამოიყენეს და ამით შეცვალეს დღის წესრიგი, მაგრამ არაუშავს, პოლიტიკური გამოსვლის შესაძლებლობა მაინც გვექნება და მელია გააკეთებს დღეს მთავარ განაცხადს იმასთან დაკავშირებით, თუ რა გეგმები აქვს და როგორ ხედავს ენმ საკუთარ ფუნქციას ამ პარლამენტში.

მე მოკლედ შემიძლია გითხრათ ჩემი აზრი ამასთან დაკავშირებით. მე ვთვლი, რომ ენმ-ს მთავარი ამოცანა ამ პარლამენტში უნდა იყოს ის, რომ მოვამზადოთ საკანონმდებლო ჩარჩო ვადამდელი საპარლამენტო არჩევნებისთვის. აქ უმნიშვნელოვანესია მართლმსაჯულების რეფორმა, რომელიც გაწერილია შარლ მიშელის დოკუმენტში", — განაცხადა ბოკუჩავამ.

ქართული ოცნების თავმჯდომარის, ირაკლი კობახიძის განცხადებით, თუ ნაციონალური მოძრობა ევროპული საბჭოს პრეზიდენტის, შარლ მიშელის დოკუმენტს ხელს არ მოაწერს, მათი მხრიდან "მკაცრი რეაგირება" იქნება. მისი თქმით, ამ შემთხვევაში ენმ დოკუმენტიდან გამომდინარე "პრივილეგიებით" ვერ ისარგებლებს.