ქართული ოცნების თავმჯდომარის, ირაკლი კობახიძის განცხადებით, თუ ნაციონალური მოძრობა ევროპული საბჭოს პრეზიდენტის, შარლ მიშელის დოკუმენტს ხელს არ მოაწერს, მათი მხრიდან "მკაცრი რეაგირება" იქნება. მისი თქმით, ამ შემთხვევაში ენმ დოკუმენტიდან გამომდინარე "პრივილეგიებით" ვერ ისარგებლებს.

"დოკუმენტში ხელმოწერის გარეშე მათ პარლამენტში შემოსვლას არავითარი ფასი არა აქვს, არც ფორმალური არც არაფორმალური. არავითარი ფასი არა აქვს მათ შემოსვლას პარლამენტში. მათ მოუწევთ აუცილებლად მიშელის დოკუმენტზე ხელის მოწერა, მოუწევთ ამას ხაზგასმით ვამბობ, წინააღმდეგ შემთხვევაში ჩვენი მხრიდან რეაგირება იქნება მკაცრი [...] თუ ხელს არ მოაწერენ მიშელის დოკუმენტს, დოკუმენტიდან გამომდინარე პრივილეგიებით ისინი, ბუნებრივია, ვერ ისარგებლებენ. მათ შორის, ვერ ჩაერთვებიან სამუშაო ფორმატებში, რომელიც უკავშირდება მიშელის დოკუმენტის აღსრულებას", — თქვა კობახიძემ.

დღეს, 8 ივნისს ნაციონალური მოძრაობა პარლამენტში პირველად მივა. 30 მაისს პარტიამ საკანონმდებლო ორგანოში შესვლის გადაწყვეტილება მიიღო. მიუხედავად ამისა, პარტია შარლ მიშელის დოკუმენტს ხელს არ მოაწერს. გადაწყვეტილება პოლიტსაბჭოს შემდეგ გახდა ცნობილი. იმავე დღეს საქართველოში ევროკავშირისა და ამერიკის შეერთებული შტატების საელჩოებმა განცხადება გაავრცელეს, სადაც აღნიშნეს, რომ ნაციონალური მოძრაობის პარლამენტში შესვლის გადაწყვეტილებას მიესალმებიან, მაგრამ წუხან ევროპული საბჭოს პრეზიდენტის, შარლ მიშელის დოკუმენტზე ხელის არმოწერის გამო.