აშშ საქართველოსთვის 88 მილიონი დოლარის დახმარების გამოყოფას გეგმავს. ამის შესახებ სახელმწიფო დეპარტამენტის 2022 წლის ფისკალური წლის ბიუჯეტშია საუბარი.

თანხები მიმართული იქნება დემოკრატიული რეფორმებისკენ, რუსული აგრესიის შეკავებასა და ეკონომიკური განვითარებისკენ. თანხა საქართველოსთვის ევროპის, ევრაზიისა და ცენტრალური აზიის დახმარების ფარგლებში გამოიყოფა. ბიუჯეტში გათვალისწინებულია დახმარება როგორც საქართველოსთვის, ისე მოლდოვასთვის, უკრაინისთვისა და დასავლეთ ბალკანეთისთვის.

როგორც დოკუმენტშია აღნიშნული, აშშ-ს დახმარება მხარს დაუჭერს საქართველოს დემოკრატიზაციას, ეკონომიკურ განვითარებას, ევრო-ატლანტიკურ ინტეგრაციასა და გაზრდის მედეგობას კრემლის მოქმედებების წინააღმდეგ.

დაფინანსება ხელს შეუწყობს ინსტიტუციური შემოწმების, ბალანსის განმტკიცებისა და კანონის უზენაესობის არსებობას; კიდევ უფრო ძლიერი სამოქალაქო საზოგადოების განვითარებას; გაუმჯობესებული, დამოუკიდებელი, საიმედო და დაბალანსებული მედიის ხელმისაწვდომობას; შერიგების მცდელობებს მათ შორის აფხაზეთის რეგიონში; ენერგეტიკული უსაფრთხოების ზრდას და განახლებადი ენერგიის განვითარებას; რეფორმების წინ წაწევას, რომელიც აუცილებელია ეკონიმიკური განვითარების დაჩქარებისთვის; კერძო სექტორში კონკურენციის გაზრდასა და სოფლის მეურნეობის პროდუქტიულობას; უცხოური ინვესტიციების მოზიდვას.