ბელარუსის პრეზიდენტმა, ალექსანდრე ლუკაშენკომ განაცხადა, რომ Ryanair-ის თვითმფრინავში ბომბის შესახებ ინფორმაცია შვეიცარიიდან მიიღეს. ლუკაშენკომ მინსკში საერთაშორისო თვითმფრინავის დასმასა და ჟურნალისტის დაკავებაზე პირველად ისაუბრა.

ამასთან, ორი დღის წინ ტრანსპორტის სამინისტროს დეპარტამენტის ხელმძღვანელმა, არტემ სიკორსკიმ განაცხადა, რომ შეტყობინება ინგლისურ ენაზე ჰამასის სახელით მიიღეს.

ლუკაშენკო ამტკიცებს, რომ კანონის ფარგლებში მოქმედებდნენ.

"როგორ უნდა მოვქცეულიყავით, მით უმეტეს ჩვენი ობიექტების დანაღმვის კასკადის ფონზე? თქვენ ბელარუსში ცხოვრობთ და იცოდეთ: რომ ყოველდღიურად "ნაღმავენ" ხან სკოლებს, ხან უნივერსიტეტებს, ხან წარმოებებს. ყველა შემთხვევაში ჩვენ ადეკვატურად ვმოქმედებთ", — განაცხადა მან.

გარდა ამისა, იგი ამტკიცებს, რომ გარე ძალები ცდილობენ ბელარუსის წინააღმდეგ ჰიბრიდული ომი აწარმოონ.

23 მაისს ათენიდან ვილნიუსისკენ მიმავალი Ryanair-ის თვითმფრინავი მინსკის აეროპორტში საგანგებოდ დაეშვა. ეს მას შემდეგ მოხდა, რაც გავრცელდა ინფორმაცია, რომ ბორტზე ასაფეთქებელი. საბოლოოდ შეტყობინება ცრუ აღმოჩნდა.

მგზავრებს შორის ოპოზიციური ტელეგრამარხის Nexta-ს ხელმძღვანელი, რომან პროტასევიჩი, რომლის წინააღმდეგაც ბელარუსში სისხლის სამართლის საქმეა აღძრული და მასობრივი არეულობის ორგანიზებას ედავებიან. პროტასევიჩი და მისი შეყვარებული, რუსეთის მოქალაქე სოფია საპეგა აეროპორტში დააკავეს. შვიდსაათიანი დაკავების შემდეგ კი ლაინერი ვილნიუსში ჩავიდა.

ევროპული ქვეყნების დიდმა ნაწილმა თვითმფრინავის დაშვება სწორედ პროტასევიჩის დაკავებას დაუკავშირა. ლიეტუვამ თავის მოქალაქეებს მოუწოდა ბელარუსის დატოვებისკენ და განაცხადა, რომ ბელარუსის საჰაერო სივრციდან რეისების მიღებასა და გაგზავნას წყვეტს. ბელარუსთან საჰაერო მიმოსვლის შეწყვეტას გეგმავს უკრაინა. გარდა ამისა, რამდენიმე კომპანიამ მათ შორის Air France-მა, airBaltic-მა, Wizz Air-მა და Lufthansa-მ ბელარუსის საჰაერო სივრცის გამოყენებაზე უარი თქვეს.

დაკავებიდან თითქმის ერთი დღის თავზე ბელარუსის სახელმწიფო მედიებმა პროტასევიჩის ვიდეო გაავრცელეს, სადაც ის აცხადებდა, რომ აღიარებით ჩვენებას აძლევდა. ასევე, აცხადებდა, რომ თავს კარგად გრძნობდა და მინსკის იზოლატორში იმყოფებოდა.

დასავლეთის შეფასებას არ იზიარებს რუსეთის ხელისუფლება. რუსეთის საგარეო საქმეთა სამინისტროს ოფიციალური წარმომადგენელი, მარია ზახაროვა ამბობს, რომ ევროკავშირისა და ნატო-ს წევრი ქვეყნების რეაქცია "გაკვირვებას იწვევს".