ქართული ოცნების დეპუტატი პარლამენტში, სოზარ სუბარი რიონის ხეობის აქტივისტებზე საუბრისას არასასიამოვნოს უწოდებს, რომ 26 მაისს საპროტესტო აქცია უნდა ჩატარდეს. მისივე შეფასებით, ისინი დამოუკიდებლობის დღის ჩაშლას ცდილობენ.

"რომ ვერ გააკეთებენ აქციას, ეს ცალკე საკითხია, მაგრამ, პრაქტიკულად, ისინი ცდილობენ ჩაშალონ საქართველოს დამოუკიდებლობის ზეიმი, დამოუკიდებლობის დღე, ყველაზე დიდი დღე, შეიძლება ითქვას, ჩვენი ერის ისტორიაში. და ძალიან არ მინდა, რომ მათ ნებსით თუ უნებლიეთ, ითამაშონ იმ ადამიანების თამაში, რომელთათვის ეს დამოუკიდებლობა არაფერს ნიშნავს და რომლებსაც პრაქტიკულად ოკუპანტი ან მისი მომხრე ჰქვია", — ამბობს სუბარი.

ნამახვანჰესის საწინააღმდეგო აქციის ორგანიზატორი, ვარლამ გოლეთიანი მოუწოდებს საზოგადოებას, რომ 26 მაისს არა აღლუმზე, არამედ მათ აქციაზე მივიდნენ. მისი თქმით, ასე შეახსენებენ ხელისუფლებას, რომ 26 მაისი არის "მათი დღე".

მეორე დღეა თბილისში, რესპუბლიკის მოედანზე ნამახვანჰესის საწინააღმდეგო აქცია იმართება. 23 მაისს აქციის მონაწილეებმა ადგილზე კარვებიც გაშალეს. ნამახვანჰესის მშენებლობის მოწინააღმდეგე პროტესტის ლიდერმა, ვარლამ გოლეთიანმა აქციაზე მოთხოვნები გააჟღერა და მათ შესასრულებლად ხელისუფლებას 24 მაისის 12:00 საათამდე მისცა. მოთხოვნების შეუსრულებლობის შემდეგ კი მათ ქალაქში ქუჩების გადაკეტვა დააანონსეს.

მოთხოვნები, რომლებიც ვარლამ გოლეთიანმა აქციაზე გააჟღერა შემდეგია:

  • დატოვოს რიონის ხეობა კომპანიამ ენკამ;
  • გაწყდეს ენკასა და სახელმწიფოს შორის დადებული ხელშეკრულება და გაუქმდეს ყველა ის დოკუმენტი, რომელიც 2015 წლიდან დღემდეა გაცემული;
  • გამოცხადდეს მორატორიუმი ენერგოსექტორში;
  • გადადგეს ეკონომიკის მინისტრი და დადგეს არამხოლოდ ნათია თურნავას, არამედ ჰესის დოკუმენტაციის მომზადებაში ჩართული ადამიანებიც პასუხისმგებლობის საკითხი.

ნამახვანჰესის მოწინააღმდეგეებსა და ხელისუფლებას შორის უშედეგო მოლაპარაკებების შემდეგ პროტესტის დედაქალაქში გადმოტანის გადაწყვეტილება მიიღეს. მთავრობამ მათ ჰესის მშენებლობაზე ერთი წლის განმავლობაში მორატორიუმი შესთავაზა, თუმცა აქციის მონაწილეების თქმით, მოსამზადებელ სამუშაოები არ გაჩერებულა.

პროტესტის თავდაპირველი ადგილი სოფელი ნამოხვანია, სადაც რამდენიმე თვის განმავლობაში ისინი ნამახვანჰესის მშენებლობას უწყვეტად აპროტესტებენ. მათ ადგილზე კარვები ჰქონდათ გაშლილი.

ისინი ამბობენ, რომ ეკოლოგიური საფრთხის გარდა, მთავრობამ მშენებელ კომპანიასთან გაფორმებული ხელშეკრულებით სახელმწიფო ინტერესები დათმო.

რიონის ხეობის აქტივისტებისგან განსხვავებით, ნამახვანჰესის კასკადის აუცილებლობასა და წარმატებაზე საუბრობს ხელისუფლება. ეკონომიკის სამინისტროს არაერთხელ განუცხადებია, რომ ეს პროექტი ქვეყნის ენერგოდამოუკიდებლობისკენ და უსაფრთხოებისკენ ერთ-ერთი აუცილებელი ნაბიჯია.

რიონის ხეობაში ჰესს კომპანია ენკა აშენებს. ENKA აცხადებს, რომ ნამახვანჰესის პროექტი დეტალურადაა შესწავლილი და რაიმე საფრთხეს მოსახლეობისთვის ან ხეობისთვის არ წარმოადგენს.

გაიგე მეტი: