ჰომოფობიასთან და ტრანსფობიასთან ბრძოლის საერთოშირსო დღისთვის საქართველოში დიდი ბრიტანეთის სალეჩომ ლგბტქ დროშა ააფრიალა.

"დაუშვებელია ადამიანების დისკრიმინაცია იმის გამო, თუ ვინ არიან ისინი, ან ვინ უყვართ. ჩვენ ვერთიანდებით LGBT+ თემის უფლებების დასაცავად და მათი ღირსეული და თანასწორი ცხოვრების უზრუნველსაყოფად. ჩვენ გვერდში ვუდგავართ LGBT+ თემს საქართველოში", — ნათქვამია საელჩოს განცხადებაში.

17 მაისს მსოფლიოში ჰომოფობიასთან და ტრანსფობიასთან ბრძოლის საერთაშორისო დღე აღინიშნება. საქართველოში ლგბტქ+ ადამიანები ამ დღეს სათანადოდ ვერ აღნიშნავენ, რადგან ძალადობრივი ჯგუფები მათ ამაში ხელს უშლიან. როგორც აქტივისტები და სამოქალაქო სექტორი აცხადებენ, მსგავსი შემთხვევებისას ხელისუფლების რეაგირება არაეფექტურია.

15 მაისს, ლგბტქ აქტივისტებმა ინსტალაცია — ფერადი კაბინა წარწერით welcome to the closet დაამონტაჟეს, სადაც ფალავანდიშვილი მივიდა და ინსტალაცია დააზიანა. ის აქტივისტებს შეურაცხყოფას აყენებდა.

აქტივისტებმა გამოიძახეს პოლიცია, რომელიც ადგილზე დაახლოებით 10 წუთში მივიდა, თუმცა ფალავანდიშვილი არ დაუკავებია და მხოლოდ რამდენიმე მეტრის მოშორებით გადაიყვანა. როგორც ადგილზე მყოფი On.ge-ს ჟურნალისტმა თქვა, მოგვიანებით ჰომოფობიური და ძალადობრივი ჯგუფის ლიდერი განარიდეს, თუმცა იქ დარჩა მისი რამდენიმე მხარდამჭერი, რომლებმაც ჰომოფობიური ბანერიც მიიტანეს.

მოგვიანებით ცნობილი გახდა, რომ ფალავანდიშვილი გამოკითხვაზე გადაიყვანეს, თუმცა არ დაუკავებიათ. ლგბტქ აქტივისტებზე თავდასხმისა და ინსტალაციის დაზიანების საქმეზე შინაგან საქმეთა სამინისტრომ გამოძიება სისხლის სამართლის კოდექსის 156-ე მუხლით დაიწყო, რაც დევნას გულისხმობს.