ჰომოფობიასთან და ტრანსფობიასთან ბრძოლის საერთაშორისო დღესთან დაკავშირებით, საქართველოში საფრანგეთის საელჩოში ცისარტყელას დროშა ფრიალებს.

"როდესაც ზოგიერთი ადამიანები იტანჯებიან, გარიყულები არიან, განიცდიან დისკრიმინაციას და მათი უფლებები ილახება, მთელი საზოგადოება იტანჯება. თანამედროვე საზოგადოება უფრო ძლიერია, როდესაც ის თვითოეულ ადამიანს საკუთარ ადგილსა და შანსს აძლევს, ქვეყნის წარმატებაში საკუთარი წვლილი შეიტანოს. საქართველოში, ისევე როგორც საფრანგეთში, წარმატების გასაღები თვითოეული ადამიანის ნიჭის მობილიზების უნარშია.

მასპინძლობისა და ტოლერანტობის დიდხნიანი ქართული ტრადიცია აჩვენებს, რომ საქართველო დიდი ხნის წინ მიხვდა ამ მთავარ ჭეშმარიტებას. ეს ღირსეული ტრადიცია ბევრისთვის მაგალითია. ყველამ რომ ნახოს მისგან სარგებელი, ეს კეთილშობილური მიზანია", — ნათქვამია საფრანგეთის ელჩის, დეიგო კოლასის განცხადებაში.

17 მაისს მსოფლიოში ჰომოფობიასთან და ტრანსფობიასთან ბრძოლის საერთაშორისო დღე აღინიშნება. საქართველოში ლგბტქ+ ადამიანები ამ დღეს სათანადოდ ვერ აღნიშნავენ, რადგან ძალადობრივი ჯგუფები მათ ამაში ხელს უშლიან.

15 მაისს, ლგბტქ აქტივისტებმა ინსტალაცია — ფერადი კაბინა წარწერით welcome to the closet დაამონტაჟეს, სადაც ფალავანდიშვილი მივიდა და ინსტალაცია დააზიანა. ის აქტივისტებს შეურაცხყოფას აყენებდა.

აქტივისტებმა გამოიძახეს პოლიცია, რომელიც ადგილზე დაახლოებით 10 წუთში მივიდა, თუმცა ფალავანდიშვილი არ დაუკავებია და მხოლოდ რამდენიმე მეტრის მოშორებით გადაიყვანა. როგორც ადგილზე მყოფი On.ge-ს ჟურნალისტმა თქვა, მოგვიანებით ჰომოფობიური და ძალადობრივი ჯგუფის ლიდერი განარიდეს, თუმცა იქ დარჩა მისი რამდენიმე მხარდამჭერი, რომლებმაც ჰომოფობიური ბანერიც მიიტანეს.

მოგვიანებით ცნობილი გახდა, რომ ფალავანდიშვილი გამოკითხვაზე გადაიყვანეს, თუმცა არ დაუკავებიათ. ლგბტქ აქტივისტებზე თავდასხმისა და ინსტალაციის დაზიანების საქმეზე შინაგან საქმეთა სამინისტრომ გამოძიება სისხლის სამართლის კოდექსის 156-ე მუხლით დაიწყო, რაც დევნას გულისხმობს.