17 მაისს, ჰომოფობიასთან და ტრანსფობიასთან ბრძოლის საერთაშორისო დღის საპირისპიროდ შექმნილ ოჯახის სიწმინდის დღეზე საპატრიარქო კვლავ თბილისის ქუჩებს აკურთხებს. სასულიერო პირები მანქანებით მოძრაობენ და ნაკურთხ წყალს ისე ასხამენ.

როგორც საპატრიარქოში აცხადებენ, თბილისის დალოცვა ილია მეორის ლოცვა-კურთხევით მოხდა.

მსვლელობის მონაწილეები სამების საკათედრო ტაძარში შეიკრიბნენ და ხუთი მიმართულებით დაიძრნენ. ადგილზე მისული იყვნენ ძალადობრივი და ჰომოფობიური ჯგუფის ლიდერი, გურამ ფალავანდიშვილი.

"მე თვითონაც პიკაპი მყავს და ვინმე თუ დადგება და აკურთხებს [ქუჩებს], კარგია. მაგრამ მე მგონია არ სჭირდებათ", — თქვა ფალავანდიშილმა.

ფოტო: გვანცა სეთურიძე / On.ge

ფოტო: გვანცა სეთურიძე / On.ge

ფოტო: გვანცა სეთურიძე / On.ge

ფოტო: გვანცა სეთურიძე / On.ge

ფოტო: გვანცა სეთურიძე / On.ge

17 მაისს მსოფლიოში ჰომოფობიასთან და ტრანსფობიასთან ბრძოლის საერთაშორისო დღე აღინიშნება. საქართველოში ლგბტქ+ ადამიანები ამ დღეს სათანადოდ ვერ აღნიშნავენ, რადგან ძალადობრივი ჯგუფები მათ ამაში ხელს უშლიან.

15 მაისს, ლგბტქ აქტივისტებმა ინსტალაცია — ფერადი კაბინა წარწერით welcome to the closet დაამონტაჟეს, სადაც ფალავანდიშვილი მივიდა და ინსტალაცია დააზიანა. ის აქტივისტებს შეურაცხყოფას აყენებდა.

აქტივისტებმა გამოიძახეს პოლიცია, რომელიც ადგილზე დაახლოებით 10 წუთში მივიდა, თუმცა ფალავანდიშვილი არ დაუკავებია და მხოლოდ რამდენიმე მეტრის მოშორებით გადაიყვანა. როგორც ადგილზე მყოფი On.ge-ს ჟურნალისტმა თქვა, მოგვიანებით ჰომოფობიური და ძალადობრივი ჯგუფის ლიდერი განარიდეს, თუმცა იქ დარჩა მისი რამდენიმე მხარდამჭერი, რომლებმაც ჰომოფობიური ბანერიც მიიტანეს.

მოგვიანებით ცნობილი გახდა, რომ ფალავანდიშვილი გამოკითხვაზე გადაიყვანეს, თუმცა არ დაუკავებიათ. ლგბტქ აქტივისტებზე თავდასხმისა და ინსტალაციის დაზიანების საქმეზე შინაგან საქმეთა სამინისტრომ გამოძიება სისხლის სამართლის კოდექსის 156-ე მუხლით დაიწყო, რაც დევნას გულისხმობს.