საპარლამენტო უმრავლესობის ლიდერის, მიხეილ სარჯველაძის განცხადებით შექმნილი დღის წესრიგის გამო ჩრდილში ექცევა ეკონომიკის გასაჯანსაღებლად ხელისუფლების მიერ გაწეული სამუშაო.

"მე მგონია, რომ — ამას არაერთხელ გაესვა ხაზი ჩვენი მხრიდან და ჩემი კოლეგებიც არაერთხელ აღნიშნავენ ამას, მწუხარებით აღნიშნავენ — პოლიტიკური დღის წესრიგი, რომელიც შემოგვთავაზა ამ შემთხვევაში ოპოზიციურმა პოლიტიკურმა პარტიებმა, მათ შორის, რა თქმა უნდა, ამას მედიის მხრიდანაც უფრო მეტი ყურადღება ეთმობა, ამის გამო თითქოს ჩრდილში ექცევა ის სამუშაო, რომელსაც სწევს რეალურად მთავრობა, ჩვენი ხელისუფლება იმ მიმართულებით რასაც ჰქვია იგივე ეკონომიკის გაჯანსაღება და ა.შ.", — ამბობს სარჯველაძე.

მისი თქმით, მედიისა და სამოქალაქო სექტორის მხრიდან ეკონომიკურ საკითხებზე ინტერესი ნაკლებია, თუმცა, ხელისუფლებისთვის სწორედ ესაა პრიორიტეტი.

სამწუხაროდ, ეს ნაკლები ინტერესის საგანია დღევანდელ პირობებში. ეს არ ნიშნავს საზოგადოების მხრიდან, ვგულისხმობ, მედიის მხრიდან, ვგულისხმობ სამოქალაქო საზოგადოების მხრიდან. თუმცა, ხელისუფლებისთვის ეს არის პრიორიტეტი და არა, მაგალითად, მიმდინარე პოლიტიკური საკითხები, რომელთან დაკავშირებითაც, სამწუხაროდ, უფრო მეტი საუბარია. ნამდვილად საწუხარია ეს, რომ რეალურად, ყოველი საღამოს თოქ-შოუში არ ვსაუბრობთ, მაგალითად, ლარის კურსთან დაკავშირებით", — განაცხადა სარჯველაძემ პალიტრანიუსის ეთერში.