ჰარვარდის უნივერსიტეტის თითქმის ოთხსაუკუნოვან ისტორიაში პირველად, ქართული კალიგრაფია და კულტურული თვითგამოხატვა აკადემიური ლექცია-სემინარის თემად იქცა. ქართველი მხატვარი და მკვლევარი, ბარბარე ურიდია, მსოფლიოს ერთ-ერთ ყველაზე პრესტიჟულ უნივერსიტეტში ჩაატარებს ვორქშოფს, რომელიც სტუდენტებს ქართული დამწერლობის ესთეტიკურ, ისტორიულ და ანთროპოლოგიურ მნიშვნელობას გააცნობს.

ორსაათიანი მასტერკლასი, რომელიც ვორქშოფის ფორმატში 10 მარტს ჩატარდება, სტუდენტებს ქართული ანბანის არა მხოლოდ წერას, არამედ ხატვას ასწავლის, როგორც აბსტრაქტული და კულტურული თვითგამოხატვის ფორმას. პროგრამა სრულად ავტორის მიერ არის შექმნილი და მოიცავს ქართული დამწერლობის გააზრებას იდენტობის ევოლუციურ ჭრილშიც.

ლექცია-სემინარის სახელწოდებაა: "დამწერლობის ცნობიერება:
ქართული კალიგრაფია როგორც კულტურული და ესთეტიკური თვითგამოხატვა". მასზე დასწრება შეუძლიათ როგორც ბაკალავრიატის, ისე მაგისტრატურისა და დოქტორანტურის სტუდენტებს, რომლებიც ამ თემით დაინტერესდებიან.

მასტერკლასი ორი საათის განმავლობაში გააერთიანებს თხრობასა და პრაქტიკას: სადაც განხილულია ის ისტორიული და ევოლუციური პროცესები, რომლებმაც თანამედროვე ქართული დამწერლობა ჩამოაყალიბა, და განსაზღვრა ის თავისუფლება, რომელსაც კულტურული კოდების ესთეტიკური გზით გადმოსაცემად, თითოეული ასო იძლევა. ამის პარალელურად, სტუდენტები სწავლობენ ასოების "ხატვას" — კალიგრაფიის ენას, სადაც წერა აღარ არის მხოლოდ ტექნიკა, არამედ ცნობიერების გაგრძელება. ქართული კალიგრაფიული ტრადიცია ვიზუალურ ფილოსოფიად წარმოჩინდება: ასოები იქცევა ხილულ იდეებად, რომლებშიც ერთიანდება ლოგიკა, ეთიკა, ცოდნა და სამყაროს ხედვა, ხოლო დამწერლობა — ცოცხალ კულტურულ სარკედ, სადაც ტრადიცია და ინდივიდუალური ინტერპრეტაცია მუდმივ დიალოგშია.

ჰარვარდი და ქემბრიჯის უნივერსიტეტები უკვე ასწლეულებია ინტელექტუალური ცხოვრების გლობალურ ცენტრად ითვლება. ქართული კულტურისა და დამწერლობის სწორედ ამ სივრცეში წარდგენა ავტორისთვის პირად მიღწევას სცდება და ეროვნული კულტურის პოპულარიზაციის მნიშვნელოვან ნაბიჯად იქცევა.

ქართველი მხატვარი ამ წარმატებას თავის ბებიასა და ბაბუას უძღვნის, ადამიანებს, რომლებმაც მისი ინტელექტუალური და პიროვნული ჩამოყალიბება განსაზღვრეს. მათთან ერთად იხსენებს ცხოვრების გზას, რომელმაც 28 წლის ასაკში აშშ-ის საჰაერო ძალების ვეტერანობამდე, ხოლო შემდეგ მსოფლიოს ერთ-ერთ წამყვან უნივერსიტეტში ლექციის წაკითხვამდე მიიყვანა.