ცენტრალურ მექსიკაში, საფეხბურთო მატჩის დროს, შეიარაღებულმა პირებმა ცეცხლი გახსნეს, რის შედეგადაც სულ მცირე 11 ადამიანი დაიღუპა და 12 დაიჭრა — ინფორმაციას The Guardian ავრცელებს.

ცენტრალური გუანახუატოს შტატის ქალაქ სალამანკას მერმა, სესარ პრიეტომ, სოციალურ ქსელებში გავრცელებულ განცხადებაში აღნიშნა, რომ შეიარაღებული პირები მატჩის დასრულების შემდეგ მივიდნენ. პრიეტოს თქმით, დაშავებულებს შორის ქალი და ბავშვიც არიან.

მერის განცხადებით, თავდასხმა ქალაქში მიმდინარე "კრიმინალური ტალღის" ნაწილია და მან მექსიკის პრეზიდენტს, კლაუდია შეინბაუმს, ძალადობის კონტროლის მიზნით დახმარებისთვის მიმართა.

გუანახუატოს შტატში გასულ წელს მექსიკაში ყველაზე მაღალი რაოდენობის მკვლელობები დაფიქსირდა. ადგილობრივი კრიმინალური დაჯგუფება "სანტა როსა დე ლიმა" დაპირისპირებაშია ძლიერ ხალისკოს ახალი თაობის კარტელთან.

"სამწუხაროდ, არსებობენ კრიმინალური ჯგუფები, რომლებიც ცდილობენ ხელისუფლების დამორჩილებას, მაგრამ ამას ვერ მიაღწევენ," — განაცხადა მერმა.

მექსიკის მთავრობის განცხადებით, 2025 წელს მკვლელობების მაჩვენებელი 2016 წლის შემდეგ ყველაზე დაბალ დონეზე იყო. თუმცა ანალიტიკოსები ამბობენ, რომ ეს მონაცემები ქვეყანაში არსებული ძალადობის რეალურ მასშტაბს შესაძლოა არ ასახავდეს.