თბილისის საქალაქო სასამართლოს მოსამართლემ, მზია გარშაულიშვილმა "სტრატეგია აღმაშენებლის" ლიდერს, გიორგი ვაშაძეს ე.წ. საბოტაჟისა და უცხო ქვეყნისთვის მტრულ საქმიანობაში დახმარების გაწევის საქმეზე აღკვეთის ღონისძიების სახით 30 000-ლარიანი გირაო შეუფარდა. ამას გარდა, მას პირადობისა და პასპორტის ჩაბარებაც დაევალა.

გიორგი ვაშაძემ პროცესზე განაცხადა, რომ მისთვის "ბრალდების არსი გაუგებარია. რა ქმედებას მედავება გამოძიება, ეს არათუ ჩემთვის, არავისთვის არ არის გასაგები. კონკრეტულად რა მოვიმოქმედე, რომ 7-იდან 15 წლამდე წარმიდგინეს ბრალი?!", — განაცხადა გიორგი ვაშაძემ.

მან თქვა, რომ გირაოს გადახდას უძრავი ქონებით უზრუნველყოფას გააკეთებს, როგორც წინა შემთხვევაში იყო, მაგრამ მოსამართლეს მიმართა, რომ არ ჩამოართვან პასპორტი და პირადობის მოწმობა, რადგან ეს ხელს შეუშლის ისარგებლოს მარტივი სერვისებით, მათ შორის, სამედიცინო მომსახურებით.

"სხვა ტიპის საქმეა, საკმაოდ მძიმე მუხლებია, აქედან გამომდინარე, ამ საქმეს საერთაშორისო ინსტანციებიც მოუწევს. ყველამ ვიცოდით, რომ მოსამართლე მაინც დააკმაყოფილებდა პროკურატურის მოთხოვნას. ამ რეალობაში ვცხოვრობთ. როდესაც უსამართლობაზე ვსაუბრობთ, სწორედ ეს არის, როდესაც არ გაქვს მოლოდინი იმისა, რომ შეიძლება მოსამართლემ სხვა გადაწყვეტილება მიიღოს, ვიდრე პროკურატურას უნდა. სამართლიანობა არის პროცედურა და არა უბრალოდ სიტყვა, რომლის მიმართ უნდა მქონდეს ნდობა, სამწუხაროდ, ნდობა დღეს არ არის. ამიტომაც ხდება ის, რაც ხდება ქვეყანაში.

ვიცოდი, რომ ზურა ჯაფარიძეს პასპორტი ჩამოართვეს და მეც რომ ჩამომართმევდნენ. სანამ შევიდოდი ვიცოდი, რომ 100%-ით დააკმაყოფილებდნენპროკურატურის მოთხოვნას. არ გავიქეცი, არ წავედი, მოვედი სასამართლოში. რატომ წამართვეს პასპორტი? იმიტომ, რომ აჩვენონ, რომ კიდევ შეუძლიათ წამება და წვალება. ადამიანისთვის პირადობის წართმევა არ შეიძლება, რადგან ის არ არის გადაადგილებისთვის. ამას მოსამართლეს იმიტომ ვესაუბრებოდი, რომ პირადობის შექმნაზე და ამ კანონებზე მე ვმუშაობდი", — განაცხადა ვაშაძემ (კომენტარს IPN ავრცელებს).