HBO-ს ახალი სერიალი შვიდი სამეფოს რაინდი გვაბრუნებს ვესტეროსის იმ ეპოქაში, რომელიც Game of Thrones-ის მოვლენებამდე დაახლოებით ერთი საუკუნით ადრე ვითარდება, ხოლო House of the Dragon-დან დაახლოებით 70 წელია გასული.

ეს არის დრო, როცა:

• ტარგარიანები ჯერ კიდევ რკინის ტახტზე სხედან;
• დრაკონები უკვე წარსულია;
• დიდი სამოქალაქო ომი არ მიმდინარეობს, მაგრამ დინასტიური დაძაბულობა აშკარად იგრძნობა;

სერიალი შეგნებულად შორდება "დიდ პოლიტიკას" და მაყურებელს მოვლენებს ქვედა ფენიდან აჩვენებს, თუმცა ეს არ ნიშნავს, რომ პერსონაჟებს დიდი ისტორიული მნიშვნელობა არ ექნებათ.

გაფრთხილება: მასალა ეფუძნება შვიდი სამეფოს რაინდის პირველ ორ სერიას და შეიცავს მცირე სპოილერებს.

ტარგარიანები — ძალაუფლების ცენტრი, რომელიც GOT-მდე მივყავართ

პირველ ორ სერიაში აშკარად ჩანს, რომ ტარგარიანები კვლავ ვესტეროსის მმართველი დინასტიაა. ისინი არ არიან დრაკონებზე ამხედრებული ღმერთები, როგორც დრაკონის სახლში, მაგრამ არც დაცემული ოჯახია, როგორც სამეფო კარის თამაშებში.

სერიალში წარმოდგენილი ტარგარიანები მნიშვნელოვანია იმიტომ, რომ ისინი ქმნიან იმ გენეალოგიურ და პოლიტიკურ ფონს, საიდანაც მოგვიანებით დაიბადება: "შეშლილი მეფე", ტარგარიანთა საბოლოო დაცემა და ბოლოს, დეინერისის ეპოქა.

ამ ეტაპზე სერიალი გვიჩვენებს ტარგარიანებს, როგორც ძალაუფლების მქონე, მაგრამ უკვე შიდა კონფლიქტებით სავსე ოჯახს, სადაც ღირსება, სამხედრო ძალა და მემკვიდრეობა ერთმანეთთან მუდმივ დაძაბულობაშია. ეს არის ის თაობა, რომელმაც ფაქტობრივად განსაზღვრა, როგორი გახდება ტარგარიანთა სახელი მომავალში: პატივსაცემი თუ საშიში. სერიალში წარმოდგენილი ტარგარიანები პირდაპირ კავშირში არიან იმ მეფეებთან და პრინცებთან, რომელთა სახელებიც სამეფო კარის თამაშებში ხშირად გვესმის ისტორიულ კონტექსტში.

ბარათეონები — ძალა, რომელიც ჯერ ჩრდილშია

სერიალში ბარათეონები ჯერ კიდევ არ არიან სამეფო ძალაუფლების ცენტრში. ისინი, მართავენ Storm's End-ს, ფლობენ ძლიერ სამხედრო ავტორიტეტს და არიან ერთგული, მაგრამ ამაყი საგვარეულო. ეს მნიშვნელოვანია, რადგან სამეფო კარის თამაშებში სწორედ ბარათეონები გახდებიან ის ოჯახი, რომელიც ტარგარიანების წინააღმდეგ აჯანყებას ჩაუდგება სათავეში. ამ სერიალში კი ჩვენ ვხედავთ მათ: სანამ ისინი ტახტზე იფიქრებდნენ და სანამ ისტორია მათ ამბიციას რეალურ შანსს მისცემდა. ირონიულია, რომ ამ სერიალში ბარათეონები ჯერ ლორდები არიან, ტარგარიანები კი მეფეები, ჩვენ კი ვიცით როგორ დასრულდება ეს ბალანსი მომავალში.

პერსონაჟები, რომლებიც პირველ ორ სერიაში გამოჩნდნენ:

სერ დანკან მაღალი

შეიძლება ვესტეროსის ისტორიულ კონტექსტში სერ დანკან მაღალის სახელი ბუნდოვნად გეცნოთ, თუმცა შვიდი სამეფოს რაინდში მას პირველად ვხვდებით, როცა ის ჯერ კიდევ მოუხერხებელი, გამხდარი ბიჭია და ბავშვობის ზედმეტსახელით, დანკით, არის ცნობილი.

დანკი სერ დანკანი მას შემდეგ გახდა, რაც რაინდად აკურთხა სერ არლანმა, კაცმა, რომელთან ერთადაც წლები იმოგზაურა, და რომლის შესახებაც ვესტეროსში ძალიან ცოტას სმენია. რადგან კურთხევის მომენტს არავინ შესწრებია, დანკანს უჭირს, სხვებმა სერიოზულად მიიღონ.

ეგი

ეს მომხიბვლელი, პატარა, მელოტი ბიჭი, დანკანს ჭკუიდან შლის, თუმცა ამავდროულად მისი ერთადერთი მეგობარიცაა. ტურნირისკენ გზაზე დანკანი ბავშვს პირველად ტავერნაში ხვდება. ეგი მაშინვე ავლენს ჯიუტ ხასიათს, და როცა მის თხოვნას (საჭურთმტვირთველად აიყვანოს) დანკანი უარით პასუხობს, ეგი მას მაინც აედევნება და ფაქტობრივად თავად ინიშნავს საკუთარ თავს ამ "თანამდებობაზე", ანთებს კოცონს და უმზადებს სადილს. სწორედ ეგი ურჩევს დანკანს, თავი სერ დანკანად წარადგინოს, რათა მეტი პატივისცემა დაიმსახუროს. ეს უცნაური წყვილია, თუმცა ერთმანეთისთვის სასარგებლონი არიან.

ამ ეტაპზე ეგი უბრალოდ ჭკვიანი და ჯიუტი ბიჭივით ჩანს, თუმცა სერიალი ნელა მიანიშნებს, რომ მისი როლი ამ ისტორიაში ბევრად უფრო მნიშვნელოვანი იქნება, ვიდრე თავიდან შეიძლება მოგვეჩვენოს.

პრინცი ბეილორ ტარგარიანი

ბეილორ ტარგარიანი არის მოქმედი მეფის, დაერონ II ტარგარიანის უფროსი ვაჟი და რკინის ტახტის ოფიციალური მემკვიდრე. აღსანიშნავია, ბეილორ ტარგარიანი არის დრაკონის სახლში ჩვენთვის კარგად ცნობილი რეინირა ტარგარიანის შვილთაშვილის შვილიშვილი. სერიალში ის წარმოდგენილია როგორც გავლენიანი, ავტორიტეტული და ზომიერი ფიგურა, ტიპი, რომელიც ტარგარიანთა ძალაუფლებას სტაბილურობისა და წესრიგის სახით განასახიერებს. სწორედ მისი თაობა ქმნის იმ პოლიტიკურ ჩარჩოს, რომელშიც მოგვიანებით ჩამოყალიბდება ის დინასტიური დაძაბულობა, რომელიც სამფო კარის თამაშებში ფატალურ შედეგებამდე მივა.

პრინცი მეიკარ ტარგარიანი

მეიკარ ტარგარიანი ბეილორის უმცროსი ძმაა და მეფე დაერონ II-ის ერთ-ერთი ვაჟი. ის მკაცრი, სამხედრო ხასიათის პრინცად ჩანს, ნაკლებად დიპლომატიური და უფრო ძალაზე ორიენტირებული. სერიალში მისი გამოჩენა მნიშვნელოვანია, რადგან იგი წარმოადგენს იმ ტიპის ტარგარიანს, რომლის მმართველობაც მომავალში უფრო მძიმე და კონფლიქტურ ეპოქას დაუკავშირდება. სწორედ მისი ხაზიდან განვითარდება ტარგარიანთა ისტორიის ერთ-ერთი ყველაზე მნიშვნელოვანი ეტაპი.

პრინცი აერიონ ტარგარიანი

აერიონ ტარგარიანი არის მეიკარის ვაჟი და ტარგარიანთა ოჯახის ყველაზე არასტაბილური ფიგურა პირველ ორ სერიაში. მისი ქცევა და დამოკიდებულება ძალაუფლების მიმართ უკვე აჩენს იმ შიდა ბზარებს, რომლებიც მოგვიანებით ტარგარიანთა სახელთან ასოცირდება. სერიალი ამ ეტაპზე არ ხსნის მის მომავალს, მაგრამ მკაფიოდ აჩვენებს, რომ იგი წარმოადგენს დინასტიის იმ მხარეს, რომელიც პრობლემების წყაროდ შეიძლება იქცეს.

ლიონელ ბარათეონი

პირველ ორ სერიაში გამოჩენილი ბარათეონი არის ლიონელ ბარათეონი, რობერტ ბარათეონის (სტანისის, რენლის) წინაპარი, Storm's End-ის ლორდი და ბარათეონების საგვარეულოს მეთაური ამ პერიოდში. ის ძლიერი, ქარიზმატული და ხმაურიანი ფიგურაა, რომელიც ჯერ კიდევ არ არის სამეფო ძალაუფლების ცენტრში, თუმცა უკვე ფლობს მნიშვნელოვან სამხედრო და პოლიტიკურ გავლენას. სამეფო კარის თამაშების კონტექსტში ლიონელ ბარათეონი აღიქმება როგორც იმ საგვარეულოს წინაპარი, რომელიც მომავალში ტარგარიანთა მმართველობას დაამხობს.

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…

შვიდი სამეფოს რაინდი HBO-ზე გადის და ამ დროისთვის უკვე გამოსულია სერიალის პირველი ორი ეპიზოდი. სერიალმა კრიტიკოსებისა და მაყურებლის მხრიდან დადებითი შეფასებები მიიღო, განსაკუთრებით პერსონაჟებზე ორიენტირებული თხრობის, მშვიდი ტემპისა და სამეფო კარის თამაშების სამყაროს უფრო ადამიანური ხედვის გამო

ასევე ნახეთ: "შვიდი სამეფოს რაინდი" — სამეფო კარის თამაშები, ოღონდ უფრო სახალისო