ჯანდაცვის მსოფლიო ორგანიზაცია ორი ჩინური ვაქცინის — სინოფარმისა და სინოვაკის ავტორიზაციას ჯერ კიდევ განიხილავს. აღსანიშნავია, რომ გადაწყვეტილება მათი ავტორიზაციის შესახებ 29 აპრილს უნდა გასაჯაროვებულიყო, თუმცა, როგორც ჩანს, WHO-ს ამ საკითხის გადასაწყვეტად დამატებითი დრო სჭირდება.

როგორც დღევანდელი ბრიფინგიდან გაირკვა, WHO-ს სტრატეგიული საკონსულტაციო ექსპერტთა ჯგუფი (SAGE) შემდეგი კვირის დასაწყისში, ან მის ბოლოს გაასაჯაროვებს სამი ვაქცინის შეფასებას. ესენია: Sinopharm, Sinovac და Moderna. ამის შესახებ ბრიფინგზე ჯანდაცვის მსოფლიო ორგანიზაციის გენერალური დირექტორის თანაშემწემ, მარიანჯელა სიმაომ განაცხადა.

აღსანიშნავია, რომ საქართველოში Sinopharm-ის 100 000 დოზაა მარაგში, ამ კონკრეტული ვაქცინის მისაღებად კი ვიზიტის დაჯავშვნა 18+ მოქალაქეებს უკვე შეუძლიათ.

ჯანდაცვის მინისტრის მოადგილემ, თამარ გაბუნიამ 16 აპრილს განაცხადა, რომ ჩინური ვაქცინა სინოფარმის ავტორიზაცია ჯანმრთელობის მსოფლიო ორგანიზაციის მიერ აპრილის ბოლოს იყო დაგეგმილი, საქართველოში ვაქცინის ადმინისტრირება კი მაისის დასაწყისიდან დაიწყება.

ჩინეთმა ორივე ვაქცინა უკვე რამდენიმე ქვეყანაში გაიტანა ექსპორტზე, მათ შორის სამხრეთ ამერიკის ქვეყნებში, აზიასა და აფრიკაში. WHO-ს დასკვნა ვაქცინის დისტრიბუციისთვის გადამწყვეტი იქნება, რადგან სწორედ ამ რეგულატორის აღიარებაა მისი ეფექტიანობისა და უსაფრთხოობის ინდიკატორი. WHO-ს დადებითი გადაწყვეტილების შემთხვევაში, Sinopharm COVAX-ის პლატფორმაზეც მოხვდება, რომელიც ვაქცინების განვითარებადი ქვეყნებისთვის მიწოდებას ისახავს მიზნად.

ასევე იხილეთ: კორონავირუსის ჩინური ვაქცინის ისტორია: ვაქცინების დიპლომატია თუ ბრძოლა საყოველთაო კეთილდღეობისთვის

WHO-ს ნებართვის მიღების შემთხვევაში, ჩინური Sinopharm იქნება პირველი ვაქცინა არადასავლური ქვეყნიდან, რომელმაც ჯანდაცვის მსოფლიო ორგანიზაციისგან მიიღო ნებართვა. ამ ეტაპზე კი, WHO-ს საგანგებო გამოყენების ნებართვა გაცემული აქვს ისეთი ვაქცინებისთვის, როგორიცაა Pfizer-BioNTech, AstraZeneca and Johnson & Johnson. ორგანიზაცია მიმდინარე კვირაში Moderna-სთვის ნებართვის გაცემის საკითხსაც განიხილავს.