პარტია მოქალაქეების ერთ-ერთი ლიდერის, ალეკო ელისაშვილის განცხადებით, ქართული ოცნებისა და ოპოზიციის შემუშავებული ამნისტიის კანონპროექტებიდან ან ორივეს დაუჭერენ მხარს, ან არცერთს. ამის მიზეზად ელისაშვილი ასახელებს იმას, რომ მათ შორის განსხვავებას ვერ ხედავს.

"არ გამოვრიცხავთ, რომ ორივეს მხარი დავუჭიროთ, არ გამოვრიცხავთ, რომ არცერთს არ დავუჭიროთ. ჩვენ არსებით სხვაობას ვერ ვხედავთ. ის, რომ ჰიპოთეტურად რაღაცა დანაშაულებები გამოჩნდება და იმას აღმოვაჩენთ, რა ჰქვია, ანტარქტიდას, ეს ცოტა არასერიოზულად ჟღერს.

ამას განხილვაზე ვეკითხებოდი — გამაგებინეთ რა იგულისხმება-მეთქი, რაზე გვაქვს კონკრეტული ეჭვი, რა ჰიპოთეტური რაღაცა შეიძლება გამოჩნდეს?! იმიტომ, რომ ასე შეგვიძლია ყველაფერს მივედაოთ და შარი მოვდოთ. ამას ვერ მივხვდი. დიდ განსხვავებას, შესაბამისად, ამ ორ კანონპროექტს შორის ვერ ვხედავ. ან ორივეს დავუჭერთ მხარს, ან არცერთს არ დავუჭერთ", — განაცხადა ალეკო ელისაშვილმა პალიტრანიუსის ეთერში.

ქართულმა ოცნებამ და ოპოზიციამ ამნისტიის შესახებ კანონპროექტის ორი სხვადასხვა ვერსია შეიმუშავეს. მხარეებს შორის განსხვავებული მოსაზრებებია იმის შესახებ კონკრეტულად რომელ მუხლებს უნდა შეეხოს ამნისტია. გარდა ამისა, დისკუსიებია იმაზე, ამნისტია მხოლოდ მიმდინარე საქმეებს უნდა შეეხოს თუ იმათაც, რომელიც 20 ივნისთან დაკავშირებით მომავალში დაიწყება.

გაიგეთ მეტი: