საქართველოს პარლამენტის წევრს ქართული ოცნებიდან, გურამ მაჭარაშვილს მიაჩნია, რომ ამნისტიის შესახებ ახალი კანონით, ასევე, საგამოძიებო კომისიის შექმნის შესახებ ინიციატივით, ოპოზიცია ცდილობს ენმ-სთან "რაღაცნაირად" გაამართლოს შარლ მიშელის დოკუმენტზე ხელმოწერა. ამის შესახებ მან პარლამენტში განაცხადა და აღნიშნა, რომ ამის მიზეზი ენმ-ის მხრიდან ბულინგია.

"საგამოძიებო კომისია, ალტერნატიული კანონპროექტი ამნისტიის თუ ასე შემდგომ, არის ოპოზიციის ნაწილოს მცდელობა, რომ რაღაცნაირად გაამართლონ თავიანთი ხელმოწერა შარლ მიშელის დოკუმენტზე, გამომდინარე ნაციონალური მოძრაობის და მათი ხელმძღვანელების ბულინგიდან. მე მინდა ვთქვა, რომ ეს არის ძალიან წარუმატებელი მცდელობა, გამომდინარე იქედან, რომ არა მხოლოდ საერთაშორისო პარტნიორების წინაშე წარდგებიან ისინი როგორც ერთი მხრივ ხელმომწერები ამ დოკუმენტზე და მეორე მხრივ არასწორად აღმსრულებლები, არამედ საკუთარი ამომრჩევლების წინაშეც. იმიტომ, რომ თვითმმართველობის არჩევნებზე საზოგადოება ზუსტად გადაახდევინებს პოლიტიკურ ფასს იმ პარტიებს, რომლებმაც არასწორი ნაბიჯები გადადგეს სახელმწიფოს სასარგებლოდ. გამომდინარე აქედან, ლელოს ეს გაუგებარი ინიციატივაც საგამძიებო კომისიასთან დაკავშირებით, ვფიქრობ, რომ ემსახურება არა ობიექტირ მიზანს, არამედ იმას, რომ რაღაცნაირად გაამართლონ თავიანთი ხელმოწერა ნაციონალური მოძრაობის წინაშე ამ პოლიტიკურ აქტთან", — განაცხადა მაჭარაშვილმა.

28 აპრილს ოპოზიციამ ამნისტიის შესახებ კანონპროექტი დაარეგისტრირა. მოლაპარაკებების შემდეგ მათ საბოლოოდ გადაწყვიტეს, რომ პროექტი ქართული ოცნებისგან დამოუკიდებლად შეემუშავებინა. მმართველი გუნდი კი ცალკე პროექტს დააინიცირებს.

რაც შეეხება ლელოს ინიციატივას, პარტიის ლიდერის, მამუკა ხაზარაძის პოზიციაა, რომ 20 ივნისის მოვლენებთან დაკავშირებით, საპარლამენტო კომისია უნდა შეიქმნას. მისი განცხადებით, საზოგადოებამ უნდა იცოდეს, ვინ გადაამეტა უფლებამოსილებას და ვინ გასცა ბრძანება.