პარლამენტის პლენარულ სხდომაზე პარტია მოქალაქეების ლიდერმა, ლევან იოსელიანმა ოპოზიციასთან თანამშრომლობის გაგრძელების იმედი გამოთქვა. შერიგების ნიშნად მან მამუკა ხაზარაძეს ხელი ჩამოართვა.

მან გაიხსენა ბოლო შეხვედრა ლელოს ოფისში, როცა ისინი "ოპოზიციიდან გარიხეს" და სწორედ ამიტომ გაუწოდა თანამშრომლობის ხელი ხაზარაძეს. მისივე თქმით, დროა ზიზღზე აგებული რიტორიკა დასრულდეს.

"ჩემი თხოვნაც არის ის, რომ დავასრულოთ ის პერიპეტიები, რაც ოპოზიციის შიგნით გვქონდა ერთმანეთის მიმართ. დავასრულოთ ერთმანეთის ზიზღზე აგებული რიტორიკა, იმიტომ, რომ ბევრი მაგალითი მივეცით ჩვენს მოქალაქეებს, როგორ შეიძლება გვძულდეს ერთმანეთი, მაგრამ ძალიან ცოტა მაგალითი მივეცით, როგორ უნდა ვცეთ პატივი ერთმანეთის აზრს.

ბოლოს, როდესაც ჩვენ ლელოს ოფისში ვიყავით და როდესაც გაიყარა ჩვენი გზები და რაღაცნაირად მოხდა ჩვენი გარიცხვა ოპოზიციიდან, ასე ითქვა მაშინ, დარწმუნებული ვიყავი, რომ ამ დარბაზში ისევ შევხვდებოდით ერთმანეთს და აქ მარცხენა ფლიგელზე მოგვიწევდა ერთად, ამ ქვეყნის საკეთილდღეოდ გადაწყვეტილების მიღება.

სწორედ ამიტომ მე მინდა, რომ დღეს მამუკა ხაზარაძეს მივმართო და გავუწოდო თანამშრომლობის ხელი და გამოვთქვა იმედი, რომ ჩვენი თანამშრომლობა ოპოზიციაში გაგრძელდება ბევრად უფრო წარმატებულად და იქნება ამ ქვეყნისთვის საკეთილდღეო", — განაცხადა იოსელიანმა პარლამენტში.

განსხვავებული რიტორიკა ჰქონდა მის თანაგუნდელს, ალეკო ელისაშვილს. მისი განცხადებით, "ზოგ-ზოგიერთი, ვინ მათ გაშაგებული ლანძღავდა, კარგია, რომ უკან დაჯდა". მისივე თქმით, ისინი, რომ წინ დამსხდარიყვნენ მათ "თვალს ვერ გაუსწორედბნენ".

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარეს, ნიკა მელიას შეეხება. თუმცა საუბარია იმაზეც, რომ გათავისუფლდებიან სამართალდამცავი უწყების ის წარმომადგენლებიც, რომლებმაც 20 ივნისის აქციაზე ძალას გადაამეტეს. ასევე, პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.