პარტია მოქალაქეების ლიდერის, ალეკო ელისაშილის განცხადებით, "ზოგ-ზოგიერთი, ვინ მათ გაშაგებული ლანძღავდა, კარგია, რომ უკან დაჯდა". მისი თქმით, ისინი, რომ წინ დამსხდარიყვნენ მათ "თვალს ვერ გაუსწორედბნენ".

"იცით, რომ თებერვლის დასაწყისში შემოვედით მე და ლევან იოსელიანი, დღეს 27 აპრილია. ამ ხნის განმავლობაში, ყველას არ ეხება, მაგრამ ნაწილს ეხება, ძალიან ბევრი ჭუჭყი მოვისმინეთ და ავიტანეთ ჩვენს წინააღმდეგ, ჩვენი გადაწყვეტილების გამო, იმის გამო, რომ აქ შემოვედით. ზიზღი და სიძულვილი მივიღეთ ზოგიერთისგან, აქ რომ არის წარმოდგენილი. გარეთ რომ არიან, იმათაც ვგულისხმობ, რა თქმა უნდა, იმათ სრულად.

ჩვენ ამას ვითმენდით და ვიტანდით, იმიტომ, რომ ეს ქვეყანა გვიყვარს და ვიცოდით, რომ ეს იყო სწორი გადაწყვეტილება ჩვენი ქვეყნისთვის. მეორეც, იმიტომ, რომ ვიცოდით, ეს დღე მოვიდოდა. კიდევ ერთხელ ვამბობ, ადრე, რომ მომხდარიყო უკეთესი იქნებოდა, მაგრამ კი ბატონო, წარსულზე არ ვილაპარაკოთ, წინ ვიყუროთ. მაგრამ ერთი რამ, რაც გამიხარდა, ის ზოგ-ზოგიერთი, რომელიც გაშმაგებული გვლანძღავდა ამ დღეების განმავლობაში, უკან რომ დაჯდა, კარგია. ესე იგი, ჰქონიათ მათ რაღაც ადამიანური. წინ რომ დამჯდარიყვნენ, თვალს ვერ გავისწორებდნენ და იმიტომ", — თქვა მან.

6-თვიანი ბოიკოტის შემდეგ 27 აპრილს ოპოზიციის ნაწილი პარლამენტში მივიდა. პარლამენტში პირველად მივიდნენ: ლელო, სტრატეგია აღმაშენებელი, რესპუბლიკური პარტია, გირჩი — მეტი თავისუფლება, ასევე, ინდივიდუალურად არიან სალომე სამადაშვილი, შალვა შავგულიძე. პარლამენტში არ არიან და დოკუმენტს ხელს არ აწერენ ნაციონალური მოძრაობა, ევროპული საქართველო, ლეიბორისტული პარტია და პატრიოტთა ალიანსი.

საკანონმდებლო ორგანოში უკვე არიან გირჩი და მოქალაქეები. მათგან ალეკო ელისაშვილის პარტია უკვე მონაწილეობს საპარლამენტო საქმიანობაში, ხოლო ხვიჩია, მეგრელიშვილი და რაქვიაშვილი აცხადებენ, რომ მხოლოდ საპარლამენტო ტრიბუნას გამოიყენებენ, ასევე, ისარგებლებენ იარაღის ტარების უფლებითა და დეპუტატის იმუნიტეტით.

პარლამენტში მისული ოპოზიცია დღეს, სავარაუდოდ, ამნისტიის შესახებ კანონპროექტს დაარეგისტრირებს, რომელიც შეთანხმების თანახმად, ნაციონალური მოძრაობის თავმჯდომარეს, ნიკა მელიას შეეხება. თუმცა საუბარია იმაზეც, რომ გათავისუფლდებიან სამართალდამცავი უწყების ის წარმომადგენლებიც, რომლებმაც 20 ივნისის აქციაზე ძალას გადაამეტეს. ასევე, პრეზიდენტი სალომე ზურაბიშვილი გიორგი რურუას შეწყალების აქტს გამოსცემს.

თავდაპირველად, ნაციონალური მოძრაობის თავმჯდომარემ, ნიკა მელიამ შეთანხმებაში გათვალისწინებულ ევროკავშირის მიერ შემოთავაზებულ გირაოზე უარი განაცხადა, თუმცა 26 აპრილს მან გირაოთი გათავისუფლებაზე მზადყოფნა გამოთქვა, იმ შემთხვევაში, თუ ამნისტიის კანონს უკან გაითხოვენ.

ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა 19 აპრილს მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.