ქართული ოცნების თავმჯდომარის, ირაკლი კობახიძის განცხადებით, დღევანდელი გადაწყვეტილება დოკუმენტის ხელმოწერის შესახებ გამომდინარეობდა აშშ-ში პარტიორებთან გამართული კონსულტაციებისგან

"ჩვენ გავცვალეთ როგორც ინფორმაცია, ასევე, მოსაზრებები. რა თქმა უნდა, მათი მხრიდან გამოითქვა კონკრეტული მოსაზრებები ამ თემასთან, დიალოგთან დაკავშირებით. კონკრეტულად რა ითქვა მათი ან ჩვენი მხრიდან ამის საჯაროდ თქმის უფლება ჩვენ არ გვაქვს. მაგრამ ზოგადად ვიტყვი იმას, რომ ჩვენი დღევანდელი გადაწყვეტილება, მათ შორის, გამომდინარეობდა იმ კონსულტაციებისგან, რომელიც ჩვენს პარტნიორებთან გაიმართა", — განუცხადა კობახიძემ რუსთავი 2-ს.

დღეს პარლამენტის თავმჯდომარე, არჩილ თალაკვაძე ამტკიცებდა, რომ შარლ მიშელის ეგიდით შექმნილ დოკუმენტზე ხელმოწერა ირაკლი კობახიძის ამერიკის შეერთებულ შტატებში გამგზავრებამდე ჰქონდათ გადაწყვეტილი.

"ჩვენ კი არ გეუბნებით ამას, რომ ქართულ ოცნებას ჰქონდა პრინციპული მზადყოფნა დოკუმენტზე ხელმოსაწერად დიალოგის ფინალურ რაუნდში, არამედ ეს თქვეს ოპოზიციის წარმომადგენლებმაც საჯაროდ და გამჭვირვალედ. მათ თქვეს, რომ თუ ჩვენ დავთანხმდებოდით, ქართული ოცნება მზად იყო ხელმოსაწერად. [...]

რაც შეეხება ბატონი ირაკლი კობახიძის ვიზიტს, ვიტყოდი, რომ ჩვენი სტრატეგიული პარტნიორი ქვეყნის სენატორებთან, კონგრესმენებთან, სახელმწიფო დეპარტამენტის წარმომადგენლებთან შეხვედრები ყოველთვის არის მაღალი მნიშვნელობის მატარებელი", — აცხადებს თალაკვაძე.

აშშ-ში მმართველი გუნდის ვიზიტი დასრულდა. კობახიძე ამბობს, რომ ისინი გაითვალისწინებენ ამერიკელი პარტნიორების მოსაზრებებსა და რჩევებს შემდგომი პოლიტიკური ნაბიჯების გადადგმას.

კობახიძის ინფორმაციით, შეხვდნენ სენატორებსა და კონგრესმენებს. მათ შორის, კრიტიკულობით ცნობილ სენატორ შაჰინსა და რიშს, კონგრესმენ კინზინგერსა და კონოლის. ასევე, კობახიძის თქმით, შეხვდენენ სახელმწიფო მდივნის მეორე მოდგილეს, ჯორჯ კენტს; NDI-ის, IRI-ისა და სხვა ორგანიზაციების პრეზიდენტებს.

პარლამენტის თავმჯდომარის, არჩილ თალაკვაძის განცხადებით, ქართული ოცნება ევროპული საბჭოს პრეზიდენტის, შარლ მიშელის ეგიდით შექმნილ დოკუმენტს ხელს აწერს. მისივე თქმით, დოკუმენტს ზუსტად შემოთავაზებული სახით აწერენ ხელს და შესაბამისად, პარლამენტი იმსჯელებს და მხარს დაუჭერს ივნისის მოვლენების ამნისტიასაც. ამასთან, თალაკვაძემ აღნიშნა, რომ ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ.

თალაკვაძის განცხადებას წინ უძღოდა ქართული ოცნების თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძის განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.

30 მარტს ქართული ოცნებისა და ოპოზიციის მორიგი მედიაცია უშედეგოდ დასრულდა. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. თავდაპირველად ხელი არ მოაწერა არც მმართველმა პარტიამ.

კრისტიან დანიელსონის მიერ წარმოდგენილ დოკუმენტში საკითხები რამდენიმე პუნქტად იყო დაყოფილი. ის ეხებოდა:

  • პოლიტიზებულ მართლმსაჯულებად აღქმულ საკითხებზე რეაგირებას;
  • ამბიციურ საარჩევნო რეფორმას;
  • კანონის უზენაესობა/სასამართლო რეფორმას;
  • პარლამენტში ძალაუფლების განაწილებას;
  • მომავალ არჩევნებს.