ქართული ოცნების დეპუტატის, შალვა პაპუაშვილის განცხადებით, ქართული ოცნებიდან წასული დეპუტატებისგან ვადამდელი არჩევნების მოთხოვნა სასაცილო იქნება.

"ვადამდელი არჩევნების მოთხოვნასთან შეერთება გამორიცხული მგონია, რა თქმა უნდა, სასაცილო იქნება. მე მგონია, რომ სასაცილო იქნება მათი მხრიდან ვადამდელი არჩევნების მოთხოვნა იმიტომ, რომ ისინი ამ გუნდის წევრები იყვნენ და სწორედ ეს 5-6 თვე იმის მტკიცებაში ვართ, რომ ვადამდელი არჩევნები ამ ქვეყანას არ სჭირდება", — განაცხადა პაპუაშვილმა მთავარი არხის ეთერში.

ქართული ოცნების ექვსმა დეპუტატმა პარტია დატოვა და ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს. საზოგადოებაში და მათ შორის, ოპოზიციაში გამოითქვა ვარაუდი, რომ გიორგი გახარიას ახალი პარტი მმართველი ძალის ყოფილი ლიდერის, ბიძინა ივანიშვილის ახალი "პოლიტიკური პროექტი" იქნება.