საპარლამენტო უმრავლესობის ერთ-ერთი წევრის, კახა კუჭავას განცხადებით, ეუროპარლამენტარებს ან შეცდომა გაეპარათ, ან მიკერძოებულები არიან. აღნიშნულით კუჭავამ მთავარი არხის კითხვას უპასუხა.

რა გზავნილია ეს ქართული ოცნებისთვის?

ქართული ოცნებისთვის რატომ? პირდაპირ წერია, ორივე პარტიისთვის.

მთავარი პასუხისმგებლობა ეკისრება ქართულ ოცნებას.

უფრო დიდი პასუხისმგებლობა ეკისრება ქართულ ოცნებას, მაგრამ მანდ არის ერთი უზუსტობა გაპარული, ქართული ოცნება მზად იყო ხელი მოეწერა.

რატომ არ მოაწერეთ?

არ იყო ფორმატი, სადაც მხოლოდ ერთს უნდა მოეწერა ხელი. არ ყველა აწერდა, ან არავინ და ძალიან სამწუხაროა, მაგრამ ეგ სიმართლეც გახდება მალე ყველასთვის ცნობილი. კიდევ მეორე უზუსტობა — დენიელსონის დოკუმენტში არ იყო საუბარი რიგგარეშე არჩევნებზე.

მაგრამ ამ წერილში არის.

საქმეც მაგაშია, როდესაც უთითებენ, რომ დენიელსონის დოკუმენტს ხელი არ მოეწერა და რიგგარეშე არჩევნებზე ვლაპარაკობთო, უკვე ჩანს ჩემთვის მიკერძოებულობა, რაც ძალიან სამწუხაროა.

ისინი მიკერძოებულები არიან?

როგორც ჩანს, ამ კუთხით ან შეცდომა გაეპარათ, ან მიკერძოებულები არიან.

რისკის ქვეშ დგას ახლა საქართველოს და ევროკავშირის ურთიერთობა?

არა, ნამდვილად და ამ სიტუაციასაც გამოვასწორებთ ისე, რომ ამ უზუსტობებსაც აღმოვფხვრით.

პოლიტიკური პარტიებისგან კომპრომისზე უარის თქმის შემდეგ, 1-ლ აპრილს ეროპარლამენტარებმა განცხადება გამოაქვეყნეს, სადაც საქართველოსთვის მაკროსაფინანსო დახმარების შეჩერებას მოითხოვენ. ისინი ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანიელსონის მედიაციით გამართული მოლაპარაკებების წარუმატებლად დასრულებაზე მწუხარებას გამოთქვამენ და ამ შედეგში პასუხისმგებლობას როგორც მმართველ, ისე ოპოზიციურ პარტიებსაც აკისრებენ.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. შეხვედრის შემდეგ მხარეებმა ისაუბრეს, რომ იყო საკითხები, რაზეც თანხმდებოდნენ, მაგრამ ნაწილზე — ვერა. მაგალითად, ლელოს ლიდერმა, ბადრი ჯაფარიძემ განაცხადა, რომ ნაციონალური მოძრაობის ლიდერ ნიკა მელიასთან დაკავშირებით შემოთავაზებული იქნა გადაწყვეტილება, რომელიც სრულად პასუხობდა პრობლემის გადაჭრას, თუმცა ეს არ განმეორდა გიორგი რურუას შემთხვევაში.

დანიელსონი მხარეებთან შეხვედრამდე საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო. მიშელის წარმომადგენელი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.