ქართული ოცნების პოლიტიკური საბჭოს წევრის, სოზარ სუბარის განცხადებით, ოპოზიციის მიერ დაანონსებული აქციები მოლაპარაკების პროცესს არ უწყობს ხელს.

"ოპოზიციის დაანონსებული აქცია ნამდვილად არ უწყობს ხელს მოლაპარაკებების პროცესს, მაგრამ, ნუ, არაუშავს ეგ ახლა, მათი გადასაწყვეტია. ამას აკეთებენ ყოველ ჯერზე იმიტომ, რომ არ უნდათ მოლაპარაკებები დასრულდეს შედეგით", — განაცხადა სუბარმა იმედის ეთერში.

მისი თქმით, არჩევნები მართლა რომ გაყალბებულიყო, ხალხი მოწოდების გარეშეც გამოვიდოდა ქუჩაში საკუთარი ხმების დასაცავად.

"ქართველ ხალხში მგრძნობელობა არის ძალიან მაღალი. ძალიან კარგად იცის ხალხმა, როდის არის ქუჩაში გამოსვლა საჭირო და ხშირად, დაძახება არც სჭირდებათ ხოლმე [...]

ოპოზიციისგან განსხვავებით, ძალიან კარგად იცის ხალხმა, რომ არჩევნები არ გაყალბებულა. რომ გაყალბებულიყო მართლა, არანაირი მოწოდება არ დასჭირდებოდა, ყველა გამოვიდოდა და დაიცავდა თავის ხმებს", — განაცხადა სოზარ სუბარმა.

მას შემდეგ, რაც ევროკავშირის წარმომადგენელი, კრისტიან დანიელსონი ბრიუსელში ისე გაემგზავრა, რომ ოპოზიციასა და მმართველ გუნდს შორის შეთანხმება ვერ შედგა, ოპოზიცია მუშაობის საგანგებო რეჟიმზე გადავიდა. მათ 15 მაისს თბილისში, დიდი აქციის ჩატარება, იქამდე კი რეგიონებში მოსახლეობასთან შეხვედრები დააანონსეს.

გაიგეთ მეტი: