საქართველოს მესამე პრეზიდენტი მიხეილ სააკაშვილი "საერთაშორისო გამჭვირვალობა — საქართველოს" (TI) განცხადებას გამოეხმაურა, სადაც ორგანიზაცია ექსპრეზიდენტს პოლიტიკურ პატიმრად აღიარებს. სააკაშვილის თქმით, დასკვნაში წერია, რომ მის მიმართ ე.წ. "პიჯაკების საქმეზე" გამოტანილი გამამტყუნებელი განაჩენი არის დაუსაბუთებელი და უსამართლო".

"თრანსფერანსი ინთერნეიშენალმა (საერთაშორისო გამჭვირვალობამ) მაღიარა პოლიტიკურ პატიმრად. დასკვნაში წერია — მის მიმართ ე.წ. "პიჯაკების საქმეზე" გამოტანილი გამამტყუნებელი განაჩენი არის დაუსაბუთებელი და უსამართლო, რის გამოც იგი უნდა ჩაითვალოს პოლიტიკურ პატიმრად, ევროსაბჭოს რეზოლუციის მიერ დადგენილი კრიტერიუმების თანახმად."

დიდი მადლობა "საერთაშორისო გამჭვირვალობას" სანდრო ბარამიძეს და ეკა გიგაურს. სჯობს გვიან ვიდრე არასდროს. ასევე მადლობა ჩემს წინააღმდეგ შეთითხნილი საქმეების დეტალური გარჩევისთვის. ოპოარხებმა ეს არ გააშუქეს, მაგრამ ჩვენ მაინც გავავრცელოთ აქ" — დაწერა სააკაშვილმა.

ცნობისთვის, 25 სექტემბერს "საერთაშორისო გამჭვირვალობა — საქართველომ"(TI) გამოაქვეყნა "მიხეილ სააკაშვილის მსჯავრდების და ბრალდების საქმეების სამართლებრივი ანალიზი", სადაც აღნიშნულია, რომ 2026 წლის ივლისში, საქართველოს მესამე პრეზიდენტის, მიხეილ სააკაშვილის ადვოკატმა მათ მიმართა და შესწავლის მიზნით გადასცა კონკრეტული საქმის მასალები (ე.წ. "პიჯაკების", საზღვრის კვეთის, ტელეკომპანია "იმედის"). TI წერს, რომ მიმდინარე საქმეებზე ექსპრეზიდენტის მიმართ წარმართული სამართალწარმოება პოლიტიკურად მოტივირებულია, რის გამოც მიხეილ სააკაშვილი, ევროსაბჭოს საპარლამენტო ასამბლეის 1900 (2012) რეზოლუციის მიხედვით აკმაყოფილებს პოლიტიკური პატიმრისთვის განსაზღვრულ (5-დან 4) კრიტერიუმს.

"აღსანიშნავია, რომ ჩვენ არ შეგვისწავლია სტრასბურგის ადამიანის უფლებათა სასამართლოს მიერ უკვე შესწავლილი საქმეები, კერძოდ, სანდრო გირგვლიანის საქმის ფიგურანტების შეწყალებისა და ვალერი გელაშვილზე ძალადობის საქმეები, რომელზეც ადამიანის უფლებათა ევროპულმა სასამართლომ მიხეილ სააკაშვილის მიმართ ადამიანის უფლებათა ევროპული კონვენციის მე-6 და მე-7 მუხლები დარღვეულად არ მიიჩნია.

ჩვენი ორგანიზაციის შეფასებით, ე.წ "პიჯაკების" საქმეზე გამოტანილი გამამტყუნებელი განაჩენი დაუსაბუთებელი და უსამართლოა, ხოლო მიმდინარე საქმეებზე მის მიმართ წარმართული სამართალწარმოება პოლიტიკურად მოტივირებულია, რის გამოც მიხეილ სააკაშვილი, ევროსაბჭოს საპარლამენტო ასამბლეის 1900 (2012) რეზოლუციის მიხედვით აკმაყოფილებს პოლიტიკური პატიმრისთვის განსაზღვრულ (5-დან 4) კრიტერიუმს", — წერს TI.

TI-ს ანალიზი სრულად წაიკითხეთ აქ.