გირჩი — მეტი თავისუფლების ლიდერის, ზურაბ ჯაფარიძის აზრით, ქართული ოცნების მოთხოვნების გამო იმდენად გააფუჭეს მოლაპარაკებების მაგიდაზე დადებული ტექსტი, რომ ის ზოგადი ჩანაწერები უკვე ევროპული საბჭოს პრეზიდნეტისთვის, შარლ მიშელისთვისაც შეურაცხმყოფელი იქნებოდა. ამის შესახებ მან TV პირველის ეთერში ისაუბრა.

"ჩემ პირადი აზრია, მე მგონია, საბოლოო ჯამში ამ ადამიანმა მოლაპარაკებები დაასრულა არა იმის გამო, რომ მიხვდა შეთანხმება შეუძლებელი იყო, უბრალოდ ტექსტი იმდენად კიდევ უფრო ისე უნდა გაეფუჭებინა და განეზოგადებინა ბევრი სხვა მიმართულებით, თავი რომ დავანებოთ ვადამდელს, რომ უკვე პირადად შარლ მიშელის თავმოყვარეობის ამბავი იდებოდა სასწორის პინაზე.

ანუ, შეიძლება, ზოგად ბოდვაზე ვინმე დათანხმებულიყო, მაგრამ უკვე მიშელისთვისაც შეურაცხმყოფელი იქნებოდა ეგეთი ზოგადი ჩანაწერები რომ ყოფილიყო. იმდენად გააფუჭეს ოცნების მოთხოვნების გამო ის რაღაცა ტექსტი", — თქვა მან.

20 მარტს ზურაბ ჯაფარიძემ განაცხადა, რომ მოლაპარაკებების დროს მმართველი პარტია არც ერთ პირობას არ თანხმდებოდა, რის გამო მედიატორების მიერ შედგენილი ტექსტი "უარესდებოდა". როგორც ჯაფარიძე განმარტავს, მედიატორები ცდილობდნენ, ტექსტში ისეთი პირობა ჩაეწერათ, რომელიც ქართული ოცნებისთვის მისაღები იქნებოდა, თუმცა ისინი არაფერს თანხმდებოდნენ.

18 მარტს ოპოზიციისა და მმართველი გუნდის შეხვედრა ევროპული საბჭოს წარმომადგენელთან, კრისტიან დანიელსონთან 10 საათი გაგრძელდა, თუმცა ისევ უშედეგოდ დასრულდა — შეთანხმება არ შედგა. დანიელსონის განცხადებით, შეხვედრაზე იყო მნიშვნელოვანი პროგრესი პრეზიდენტ მიშელის დატოვებულ 6-პუნქტიან გეგმის ირგვლივ ზოგიერთ პუნქტში.

"ეს მისასალმებელია და ძალიან მნიშვნელოვანია იმისთვის, რომ მოხდეს ამ საკითხების მოგვარება. რაც შეეხება სხვა საკითხებს, ნაკლები პროგრესი იყო", — თქვა მან.

დანიელსონმა აღნიშნა, რომ 19 მარტს საქართველოს დატოვებს და ბრიუსელში დაბრუნდება. მისი თქმით, შარლ მიშელს მოლაპარაკების დეტალებს მოახსენებს.

პოლიტიკოსები ევროკავშირის წარმომადგენლობის ოფისში დღის 3 საათისთვის შეიკრიბნენ და იმის შემდეგ მოლაპარაკებები არ შეწყვეტილა.

მოლაპარაკებების პარალელურად, ლეიბორისტული პარტიის ლიდერმა, შალვა ნათელაშვილმა, რომელმაც 17 მარტს შეხვედრა პროტესტის ნიშნად დატოვა, გაავრცელა რამდენიმე დეტალი, რომელიც მისი თქმით, მაგიდასთან განიხილებოდა. ნათელაშვილი ამტკიცებს, რომ მათ მიაწოდეს დოკუმენტები, რომლის პრეამბულაშივე ეწერა, რომ პარლამენტში უნდა შესულიყვნენ და არჩევნები 2024-ში ჩატარდებოდა. მისივე ოპოზიციას, სთავაზობდნენ 5 კომიტეტის თავმჯდომარეობას და 2 საპარლამენტო დელეგაციის ხელმძღვანელობას.

დანიელსონი საქართველოს 14 მარტს ტოვებდა, თუმცა ამ დღეს ქართული ოცნებისა და ოპოზიციის შეხვედრები უშედეგოდ დასრულდა, რის გამოც შარლ მიშელის წარმომადგენელმა თბილისიდან გამგზავრება ერთი დღით გადადო, თუმცა უფრო მეტი ხნით დარჩა. მოლაპარაკებების პარალელურად, პრემიერმინისტრი ბელგიაში შეხვედრებს მართავდა საერთაშორისო პარტნიორებთან, სადაც, ასევე, ქვეყანაში არსებული პოლიტიკური კრიზისი განიხილებოდა.

დანიელსონი საქართველოში არსებული პოლიტიკური ვითარების განმუხტვის მიზნით ევროპული საბჭოს პრეზიდენტის, შარლ მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: