სერბეთის პრეზიდენტმა ალექსანდარ ვუჩიჩმა გადადგომის შესახებ განაცხადა, რითაც მან თავისი მეორე და საბოლოო ხუთწლიანი საპრეზიდენტო ვადა დაასრულა და გზა გაუხსნა რიგგარეშე საპარლამენტო არჩევნებს. ინფორმაციას Reutes ავრცელებს.

ვუჩიჩის გადადგომა, ვადის ამოწურვამდე შვიდი თვით ადრე, სერბეთის 25 ოქტომბრის რიგგარეშე საპარლამენტო არჩევნების წინასაარჩევნო კამპანიას დაემთხვა. ეს ნაბიჯი მას საშუალებას მისცემს, პრემიერმინისტრად დაინიშნოს, თუ მისი პარტია სერბეთის პროგრესული პარტია (SNS) ახალ მთავრობას შექმნის.

მან ივნისის ბოლოს განაცხადა, რომ გადადგომას გეგმავდა და სერბეთში რიგგარეშე საპარლამენტო და საპრეზიდენტო არჩევნები გაიმართებოდა.

უფლებადამცველი ჯგუფები ვუჩიჩსა და მის მოკავშირეებს სავარაუდო ავტორიტარული მმართველობის გაძლიერებაში ადანაშაულებენ. ანტისამთავრობო დემონსტრანტები აცხადებენ, რომ პოლიციამ ისინი სცემა და უკანონოდ დააკავა, თუმცა ხელისუფლება ამ ბრალდებებს უარყოფს.

კვირას, ბელგრადის ცენტრში, პრეზიდენტის ადმინისტრაციის შენობის წინ, შეკრებილმა ასობით მხარდამჭერმა ვუჩიჩი შეძახილებით გააცილა.

"ეს ჩემთვის ბოლო საღამოა ამ შენობაში", — მიმართა მან დროშების ფრიალით შეკრებილ ხალხს გადადგომამდე რამდენიმე წუთით ადრე.

"მე ერთგულად გემსახურეთ თქვენ და ჩემს სამშობლოს, სერბეთს... ვამაყობ იმით, რაც ერთად გავაკეთეთ", — აღნიშნა მან.

სერბეთის კონსტიტუციის თანახმად, ახალი პრეზიდენტის არჩევამდე მოვალეობას პარლამენტის მოქმედი სპიკერი ანა ბრნაბიჩი შეასრულებს. საპრეზიდენტო არჩევნები 90 დღეში უნდა ჩატარდეს, საარჩევნო კამპანია კი 30-დან 60 დღემდე გასტანს.

"დეკემბრის ბოლომდე ჩვენ გვექნება საპრეზიდენტო არჩევნების პირველი ტური", — განაცხადა ვუჩიჩმა.