რადიო თავისუფლების ბრიუსელელი კორესპონდენტის ცნობით, ევროკავშირის მინისტრებმა კრისტიან დანიელსონის მისიის გაგრძელებას საქართველოში ძირითადად მხარი დაუჭირეს. ბრიუსელში ევროკავშირის საგარეო ურთიერთობათა საბჭოს სხდომა, ბლოკში შემავალი ყველა წევრი ქვეყნის საგარეო საქმეთა მინისტრების მონაწილეობით დღეს გაიმართა.

მედიის ინფორმაციით, ევროკავშირის საგარეო პოლიტიკისა და უსაფრთხოების პოლიტიკის ხელმძღვანელმა, ჟოზეპ ბორელმა ევროკავშირის მინისტრებს საქართველოში ევროპული საბჭოს პრეზიდენტის, შარლ მიშელის, პირადი წარმომადგენლის, კრისტიან დანიელსონის შუამავლობით ოპოზიციასა და ხელისუფლებას შორის გამართული მოლაპარაკებების შესახებ მოკლედ უამბო.

"აღინიშნა, რომ ამ მოლაპარაკებამ წარმატებას ვერ მიაღწია. შესაბამისად, კრისტიან დანიელსონის მისიის გაგრძელების შესახებ საკითხი წამოიჭრა, რასაც ევროკავშირის საგარეო საქმეთა მინისტრები ძირითადად დაეთნხმნენ. მაგრამ ის, თუ როდის ჩამოვა საქართველოში დანიელსონი, მოგვიანებით, მისი და შარლ მიშელისა შეხვედრის შემდეგ გახდება ცნობილი", — იტყობინება ჟურნალისტი რიკარდ იოზვიაკი.

ევროპული საბჭოს პრეზიდენტის, შარლ მიშელის პირად წარმომადგენელ კრისტია დანიელსონთან ქართული ოცნებისა და ოპოზიციის შეხვედრები უშედეგოდ დასრულდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი: