მარტის ბოლო შაბათს, ტრადიციულად, დედამიწის საათი აღინიშნება. ბუნების მსოფლიო ფონდის მიერ შექმნილი პროექტი, რომელიც გარემოს დაცვის საკითხებზე ყურადღების გამახვილებას და კლიმატის კრიზისის შესახებ ცნობიერების ამაღლებას ემსახურება, წელს უკვე მეთხუთმეტედ მართავს მასშტაბურ ღონისძიებას; ერთი გამონაკლისით — თითქმის ყველაფერი დისტანციურად.

27 მარტს მსოფლიოს 190-მდე ქვეყანასა და 7 ათასამდე ქალაქში, ზუსტად ერთი საათით — საღამოს ცხრის ნახევრიდან ათის ნახევრამდე — ელექტროგანათების ყველანაირ წყაროს გამორთავენ. ეს არის პლანეტაზე ზრუნვის ერთგვარი სიმბოლო; ჩაბნელებულ ქუჩებში ანთებული სანთლებით გამოსახული "60+"-ის ნიშანი კი ადამიანებს ახსენებს, რომ გარემოს დაცვა წელიწადში მხოლოდ ერთ საათს არ უნდა მოიცავდეს.

როგორც უკვე აღვნიშნეთ, კორონავირუსის პანდემიის გათვალისწინებით, დაგეგმილი ღონისძიებების უმეტესი ნაწილი დისტანციურად გაიმართება. ამასთან, წელს პირველად გექნებათ შესაძლებლობა, ჩაერთოთ "ვირტუალურ სფოთლაითში" — 27 მარტს ციფრულ პლატფორმებზე გამოქვეყნდება ვიდეო, რომლის გაზიარებითაც კამპანიაში ჩაბმას შეძლებთ.

კიდევ ერთი სიახლე, რომელიც წლევანდელ დედამიწის საათს უკავშირდება საქართველოში, ახალი ვებსაიტია.

ვებსაიტის მთავარ გვერდზე დედამიწის საათამდე დარჩენილი დროის უკუათვლაა დაწყებული, მის სხვადასხვა გვერდებზე კი შეხვდებით წლევანდელი ღონისძიებების აღწერას და ბლოგების სერიას, სადაც ცნობილი ადამიანები დედამიწაზე ზრუნვასა და პროექტის მნიშვნელობაზე საუბრობენ.

ფოტო: Earth Hour Georgia

დედამიწის საათი პირველად 2007 წელს, სიდნეიში აღინიშნა. ამის შემდეგ ეს ინიციატივა გლობალურ მოძრაობად ჩამოყალიბდა და მთელი მსოფლიო მოიცვა. მისი ხელშეწყობით არაერთი პროექტის განხორციელება მოხერხდა — მილიონობით ხის დარგვა, ტყეების შექმნა, განახლებადი ენერგიის წყაროების დანერგვა, ხმელეთის და საზღვაო ეკოსისტემების დაცვა და, რაც მთავარია, მსოფლიოს ყურადღების მიპყრობა კლიმატის კრიზისისაკენ.