დედაქალაქის მერის, კახა კალაძის განცხადებით, ვაშლიჯვრის მეწყრულ ფერდობთან სპეციალური მონიტორინგის სისტემები დამონტაჟდება. მისივე თქმით, გერმანელი ექსპერტები სთავაზობენ სადრენაჟო და გამაგრების სამუშოების განხორციელებას და "მისაღები ზომები კვირის ბოლოსკენ დაკონკრეტდება", როცა კვლევის პირველადი მონაცემები იქნება.

"[მონიტორინგის სისტემა] მოგვცემს საშუალებას, რომ არ გამოგვრჩეს არავითარი ცვლილება იქ მიმდინარე პროცესებთან დაკავშირებით", — განაცხადა მან მთავრობის სხდომაზე.

მისივე თქმით, ამ ეტაპზე მიმდინარეობს ფერდის კვლევა, პროექტირება და სამუშაო ჯგუფები გერმანელ სპეციალისტებთან ერთად მუშაობენ.

კალაძე ამბობს იმასაც, რომ მეწყერსაშიშ ზონაზე დეზინფორმაცია ვრცელდება და მედიასაშუალებებს მოუწოდებს, რომ ფაქტები გადაამოწმონ. ასევე, აკრიტიკებს სპეციალისტებს.

"სამწუხაროდ უნდა აღვნიშნო, რომ ბოლო დღეების განმავლობაში კონკრეტულ მედიასაშუალებებში მიზანმიმართულად ხდება დეზინფორმაციის გავრცელება და პანიკის დათესვა, რაც ძალიან ცუდია. კიდევ ერთხელ მინდა მოვუწოდო ამ მედიასაშუალებებს, რომ თავი შეიკავონ გადაუმოწმებელი და არასწორი ინფორმაციისგან", — განაცხადა მან.

მისი განცხადებით, მეწყრული ფერდის შესწავლის პროცესში თავიდანვე ჩართეს ექსპერტები გარემოს ეროვნული სააგენტოდან, საგანგებო სიტუაციების მართვის სამსახურიდან, სამხარაულის ექსპერტიზის ბიუროდან, ასევე, დარგის სხვადასხვა სპეციალისტები. თუმცა აღნიშნავს, რომ სხვა სპეციალისტებსაც შეუძლიათ მონაწილეობა.

"მე ვიცი, რომ არის კიდევ გარკვეული დაინტერესებული ჯგუფები, ექსპერტები, ვინც ზოგადად მეწყრულ ადგილებს სწავლობს დედაქალაქში და ძალიან ბევრი ინფორმაცია აქვთ. შესაბამისად, მინდა, ჩემს მოადგილეს, ირაკლი ბენდელიანს დავავალო, რომ ეს ადამიანები ჩართოთ ამ სამუშაო ჯგუფში. ისინი ცუდს არაფერს არ გააკეთებენ, პირიქით, უფრო საინტერესო ინფორმაციას მოგვაწვდიან და ერთობლივი ძალებით მოვაწესრიგოთ და რაც შეიძლება სწრაფად მოვაგვაროთ კონკრეტული პრობლემა", — თქვა მან.

17 მარტს ფორუმზე გავრცელდა ფოტოები, სადაც ჩანს, რომ ვაშლიჯვრისა და ნუცუბიძის დამაკავშირებელი გზის ფერდობზე ნაპრალები გაჩნდა. ფოტოების გავრცელებამდე, დილით, თბილისის მერმა, კახა კალაძემ განაცხადა, რომ მაჭავარიანის ქუჩაზე მეწყრული პროცესების გააქტიურების გამო ტრანსპორტის მოძრაობა ორმხრივად შეიზღუდებოდა. კალაძეს არ უთქვამს ზუსტად როდის დაიწყო ეს პროცესები, თუმცა აღნიშნა, რომ დამეწყრილი უბნის შესწავლაში მერიის სამსახურებთან ერთად, შესაბამისი უწყებების სპეციალისტები უკვე ჩართულნი იყვნენ.

ექსპერტები ამბობენ, რომ მეწყრის სისტემა დაძრულია და დღეში 5სმ-ით მოძრაობს. მათი თქმით, საფრთხე რეალურია და მიწის მასა, შესაძლოა, ჩამოვიდეს.

მერის მოადგილის, ირაკლი ბენდელიანის განცხადებით, ნალექიანი ამინდების შემთხვევაში, მაჭავარიანის ქუჩასა და მიმდებარე ტერიტორიაზე სრულად გაჩერდება სამშენებლო სამუშაოები.

გაიგეთ მეტი:

• მეწყრის საფრთხე თბილისში — რა ვიცით