გარემოს ეროვნული სააგენტოს გეოლოგიის დეპარტამენტის უფროსი მერაბ გაფრინდაშვილის განცხადებით, ვაშლიჯვრის მიმდებარედ არსებული ნაპრალები ახალი არაა და წლებია არსებობს. ამის შესახებ მან თბილისის მერიაში ბრიფინგზე განაცხადა.

"გავრცელებული ინფორმაცია, თითქოს ვაშლიჯვრის მიმდებარედ გაჩნდა ახალი ნაპრალები, ახალი რღვევები, ეს რღვევებიც და ნაპრალებიც არახალია, ათეული წლებია არსებობენ. არავითარი საფრთხე ამ ეტაპზე მოსახლეობასთან მიმართებით არ არსებობს", — აღნიშნა მან.

გარდა ამისა, გაფრინდაშვილი ამბობს, რომ მეწყერს, რომელიც მარტის დასაწყისში გააქტიურდა, დღეს გავრცელებულ კადრებთან კავშირი არ აქვს.

დედამიწის შემსწავლელ მეცნიერებათა ინსტიტუტისა და სეისმური მონიტორინგის ეროვნული ცენტრის დირექტორმა, თეა გოდოლაძემ განაცხადა, რომ მაჭავრიანის ქუჩის მიმდებარე ფერდობზე ახალი ნაპრალები გაჩნდა.

ვაშლიჯვრისა და ნუცუბიძის დამაკავშირებელ გზაზე მეწყერი ჩამოწვა. ამის ამსახველი ფოტოები 17 მარტს ფორუმზე გავრცელდა. მეწყერზე 17 მარტს ისაუბრა თბილისის მერმა, კახა კალაძემაც. მისი თქმით, აღნიშნულ ტერიტორიაზე განხორციელებული სხვადასხვა აქტივობის გამო, დროებით სტაბილიზაციაში მყოფ ძველ მეწყრულ არეალში მეორადი გენერაციის მეწყერი განვითარდა. კალაძის განცხადებით, მოქალაქეთა უსაფრთხოების მიზნით, ტრანსპორტის მოძრაობა დროებით ორმხრივად შეიზღუდა.

სპეციალისტები ამბობენ, რომ პრობლემა სერიოზულია და საუბარია ნახევარი მილიონი კუბური მეტრის მასაზე, რომლის შეჩერება შეუძლებელია. ამასთან, მერიაში აცხადებენ, რომ მოსახლეობას საფრთხე არ ემუქრება.

გაიგეთ მეტი: