წლის დეტექტივი — ქართული უნივერსიტეტი ლიტერატურულ კონკურსს აცხადებს

თუკი კალამი გიჭრით და, როგორც იტყვიან, წერას ჰყავხართ ატანილი (შემოქმედებითი გაგებით), თქვენთვის კარგი ამბავი გვაქვს.

კრიმინალური სერიალის ყურებისას ან დეტექტიური წიგნის კითხვისას ალბათ ბევრჯერ გიოცნებიათ, თავად შეგექმნათ ისეთი ნაწარმოები, რომელიც მაყურებელს/მკითხველს მთელი ღამე არ დააძინებდა. სწორედ ამის შესაძლებლობას გაძლევთ ნიუ ვიჟენ უნივერსიტეტი, რომელმაც ცოტა ხნის წინ ლიტერატურული კონკურსი — "წლის დეტექტივი" — გამოაცხადა.

კონკურსი, რომელშიც ყველა მსურველს შეუძლია მონაწილეობის მიღება, ქართულ ლიტერატურულ სივრცეში დეტექტიური ჟანრის განვითარებასა და მკითხველთა წრეებში მის პოპულარიზაციას ისახავს მიზნად.

ქართულ ენაზე შესრულებული ორიგინალური ტექსტის მოცულობა მინიმუმ 8 000 სიტყვა უნდა იყოს.

რაც მთავარია, ჯილდოც სოლიდურია — გარდა სამი საპრიზო კატეგორიისა: წლის დეტექტივი (3 000₾), საუკეთესო პერსონაჟი (2 500₾) და საუკეთესო სიუჟეტი (2 500₾) — ჟიურის რჩეულ ნაწარმოებს უნივერსიტეტის გამომცემლობა გამოსცემს. გამოცემული წიგნი, შესაძლოა, სასწავლო კურსების სილაბუსში აღმოჩნდეს და, არც მეტი, არც ნაკლები, ფილმადაც კი იქცეს.

აღსანიშნავია, რომ დეტექტიური ჟანრი და თრილერი ბოლო წლებია, ბესტსელერების სიაში მოწინავე ადგილებს იკავებს. კონან დოილიდან და აგათა კრისტიდან დენ ბრაუნამდე და რობერტ გელბრეითამდე — ინტერესი დაძაბული და ჩახლართული ამბების მიმართ არასდროს განელებულა.

დეტექტივების მოყვარულ მილიონობით მკითხველს შორის ქართველებიც მრავლად არიან, ამიტომ, თქვენ მიერ შექმნილ ნაწარმოებს, წარმატების შემთხვევაში, სამი წევრისგან შემდგარ ჟიურისთან ერთად, ბევრი კრიტიკული თვალიც შეაფასებს.

საკონკურსო ნაწარმოებები 2021 წლის 15 მაისის ჩათვლით მიიღება. კონკურსთან დაკავშირებულ დამატებით დეტალებს კი უნივერსიტეტის ვებგვერდიდან შეიტყობთ.