მთავარი არხის იურისტი, თამთა მურადაშვილი TV პირველის მასალებზე სასამართლოს გადაწყვეტილების გამოცხადების შემდეგ ძალოვანი უწყებების მხრიდან ძალადობრივ სცენარს არ გამორიცხავს.

"მე ველოდები ყველაფერს. თქვენც უნდა იყოთ მზად სტრასბურგისთვის მართლა დაიწყოთ მუშაობა... სულ არ გამიკვირდება იგივე სცენა ვნახოთ, კიბეზე და აქ სნაიპერები ჩამოვიდნენ. უბრალოდ, თქვენ უნდა იყოთ ახლა მაგრად. იმ მოსამართლეს საერთოდ არ უფიქრია, რომ შეიძლება ადამიანის სიკვდილი დადგეს იმ შემთხვევაში, თუ შემოვა პროკურატურა და წაიღებს ამ მასალებს იძულებით. ამ პირობებში მე ველოდები ყველაფერს...

პროფესიული სიკვდილია თქვენი ჟურნალისტების და მთლიანად არხის ერთი პატარა მინიშნებაც მაინც რომ მისცეთ სახელმწიფოს, თუ ვინ შეიძლება იყოს, იქნება ეს შიგნითა თუ გარე წყარო. ამიტომ, დაივიწყონ ახლა ეს ამბავი", — განაცხადა მურადაშვილმა TV პირველის ეთერში.

11 მარტს TV პირველმა მიიღო სასამართლოს განკარგულება, რომლითაც დაკმაყოფილდა პროკურატურის მოთხოვნა ტელეკომპანიიდან ბერა ივანიშვილისა და ირაკლი ღარიბაშვილის საუბრის ჩანაწერების ამოღების შესახებ. თუმცა განკარგულებაში წერია ისიც, რომ თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: