ქართული ოცნების დეპუტატის, სოზარ სუბარის განცხადებით, TV პირველში შეჭრაზე ლაპარაკი არის "უბრალოდ ტყუილი და ტემპერატურის აწევის მორიგი მცდელობა". იგი იმედს გამოთქვამს, რომ ამ "აწეული ხმაურით" ოპოზიცია მოლაპარაკებების ჩაშლას არ ეცდება.

"არანაირ შეჭრაზე ლაპარაკი არ არის. ეს არის უბრალოდ ტყუილი, გამოგონილი, რაღაც ტემპერატურის აწევის მორიგი მცდელობა, ისევ ისე, როგორც იყო ფალსიფიცირებული ჩანაწერები, რომლებიც გამოქვეყნდა. მე წეღან ვთქვი, რომ ოპოზიცია ეცდება ახლა გამოაგოროს ახალი თემა, რომლითაც ეცდებიან მოლაპარაკებების ჩაშლას.

მე ძალიან არ მინდა, რომ ეს თქვეგან აწეული ხმაური გამოდის ზუსტად ის თემა, რომლითაც ეცდებიან მოლაპარაკებების ჩაშლას. იმედია, ასე არ არის. იმედია, ამ შემთხვევაში ოპოზიციის წისქვილზე წყალს არ ასხამთ და ოპოზიციის ნარატივს არ აჟღერებთ. რადგან გამოძებას ითხოვდით თქვენც და მთელი ოპოზიციური სპექტრიც, კარგი იქნება თანამშრომლობა. სხვანაირად გამოძიება ფაქტების გარეშე არ არსებობს", — თქვა მან.

11 მარტს TV პირველმა მიიღო სასამართლოს განკარგულება, რომლითაც დაკმაყოფილდა პროკურატურის მოთხოვნა ტელეკომპანიიდან ბერა ივანიშვილისა და ირაკლი ღარიბაშვილის საუბრის ჩანაწერების ამოღების შესახებ. თუმცა განკარგულებაში წერია ისიც, რომ თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: