რამდენჯერ დაგმახსოვრებიათ მომსახურება? აი, ისე, რომ მიიღებ ვინმესგან მომსახურებას და მოგინდება, რომ ამ გამოცდილებაზე ყველას მოუყვე.

CARU-ს დამფუძნებლის, ნიკა აბაშიძის აზრით, თუ დღესდღეობით კომპანიას სურს, რომ წარმატებას მიაღწიოს, სწორედ ასე უნდა იქცეოდეს.

"მიზანი მომხმარებლის დაკმაყოფილება კი არა, აღფრთოვანება უნდა იყოს".

ნიკა აბაშიძე, CARU-ს დამფუძნებელი

ასე გახდა CARU 2 წელიწადში ერთ-ერთი ყველაზე დიდი ავტოსერვისი საქართველოში, რომელიც თვეში 1000-მდე მანქანას ემსახურება.

ერთი საინტერესო შემთხვევის შემდეგ კი ამ მიდგომას სახელიც მოეძებნა. ამ სტატიაში სწორედ იმაზე მოგიყვებით, თუ როგორ შეიქმნა ახალი ქართული სიტყვა — დრუნჩნათლად.

ბევრ კმაყოფილ მომხმარებელთან ერთად, CARU-ს, რა თქმა უნდა, ჰყავდა უკმაყოფილო მომხმარებლებიც, რომელთაც პრობლემა შეექმნათ და მისი გამოსწორება გახდა საჭირო. ნიკამ აღმოაჩინა, რომ ასეთ დროს მომხმარებლებს, უბრალოდ, არ სჯეროდათ კომპანიის და ფიქრობდნენ, რომ რაღაცას უმალავდნენ და ატყუებდნენ.

"თავიდან ეს მიკვირდა, მერე კი, სიმართლე გითხრათ, აგრესიასაც კი იწვევდა", — ამბობს ნიკა, — "როცა რაღაცას აკეთებ, ცდილობ დაეხმარო ადამიანს და გეუბნება, 'აფერისტები ხართ ყველანი', 'ახლა რაღას მატყუებთ?', 'ასე კარგად თუ შეგეძლოთ, თავიდანვე გაგეკეთებინათ'. მართალია, ასეთი შემთხვევები მთლიანი შეკვეთების 0,6 პროცენტი იყო, მაგრამ როდესაც მთლიანი შეკვეთების რაოდენობა ათიათასობითაა, 0,6 პროცენტი საკმარისია, რომ ზოგჯერ განწყობა მთელი კვირითაც გაგიფუჭდეს. სულ უშეცდომოდ ვერ იმუშავებ. შეცდომა ყოველთვის მოხდება და ყოველთვის იქნება წუნიანი (ბრაკი) ნაწილიც, რომელიც მწარმოებელს გაეპარა, მაგრამ მომხმარებელს ამის შესახებ სიტყვის გაგონებაც კი არ უნდა. იგი ფიქრობს, რომ კომპანია ბოროტია და ცდილობს, რაღაც მოატყუოს".

ნიკას თქმით, იგი ვერაფრით ხსნიდა, რატომ ფიქრობდა ხალხი ასე, სანამ თავადაც ერთი შემთხვევა თავად არ გადახდა თავს.

"რაღაც ნივთის ყიდვა გადავწყვიტე, რომლისთვისაც დამჭირდა კრედიტი", — იხსენებს იგი, — "პროცესში აღმოვაჩინე, რომ ნივთის გამყიდველი ცდილობდა, თავიდან უარესი ვარიანტი შემოეთავაზებინა, რომ ჯერ ის 'გასაღებულიყო', მერე რომ გაიგო მეჩქარებოდა, კაპიკი არ დამიკლო და ბოლომდე 'გამწურა', მეორე მხრივ კი ერთ-ერთ ბანკთან აღმოვაჩინე, რომ შეეძლო, უკეთესი პირობები მოეცა, მაგრამ სანამ არ გადავამოწმე და დავაზუსტე, არ მომცა".

CARU-ს დამფუძნებელი აღნიშნავს, რომ სწორედ მაშინ გააცნობიერა, რა ხდებოდა რეალობაში.

"კომპანიების უმეტესობა იმით აჯილდოებს თანამშრომელს, თუ რამდენად მომგებიანად გასცემენ, მაგალითად, სესხს", — ამბობს ნიკა, — "აი, თურმე სად ყოფილა პრობლემა. ყველა მომხმარებელი, რომელიც მლანძღავდა მაშინ, როცა ამას არ ვიმსახურებდი თავის დროზე, მართალი ყოფილა, რადგან მათ ყოველდღე ატყუებდნენ და, რა თქმა უნდა, ფიქრობდნენ, რომ ჩვენც ასე ვიქცეოდით.

"მაშინ მივხვდი, რომ ჩვენი მომსახურება განსხვავდებოდა და ამ სხვანაირ მიდგომას სახელიც სჭირდებოდა. ბევრი ვიფიქრე, თუ რას ჰგავდა ეს ქცევა და, ბოლოს, ერთ მარტივ ახსნამდე მივედი. ყველამ იცის ბიგლუს შესახებ და ისიც რომ CARU გიჟდება ძაღლებზე, ამიტომ, როგორც ჩანს, ქვეცნობიერად ჩვენც ძაღლებს ვბაძავდით. ანუ, ვცდილობდით, რომ მომხმარებლისთვის გაგვეკეთებინა საქმე ისე, როგორც ამას გააკეთებდა ბიგლუ; აი, ეზოში რომ ძვალს იპოვის, მოგიტანს, წინ დაგიდებს და თვალებში შემოგციცინებს. ამ დროს ხვდები, რომ გეკითხება 'აბა, მოგწონს?'.

სწორედ ეს გახდა მიზეზი, რომ კომპანიას საკუთარი მიდგომისათვის სახელად დრუნჩნათლად ეწოდებინა.

"დრუნჩნათლად ნიშნავს, აკეთო საქმე ისევე, როგორც ამას შენი ძაღლი გააკეთებდა. პირნათლად, მაგრამ დაამატო ზემოდან შენი მონდომება, რათა ასიამოვნო მომხმარებელი".