მთავარმა პროკურორმა ირაკლი შოთაძემ განაცხადა, რომ საოკუპაციო ხაზთან მომხდარი მკვლელობის ჩამდენის ვინაობა გამოძიებისთვის ცნობილია. ტელეკომპანია იმედის ეთერში, გადაცემა პოლიტიკაში საუბრისას, პროკურორმა აღნიშნა, რომ საზოგადოებას უახლოეს დღეებში ეცნობება გამოძიების დეტალები:

"საზოგადოებას მინდა ვაცნობო, რომ საქართველოს შინაგან საქმეთა სამინისტრო იძიებს ხურჩაში მომხდარ მკვლელობის საქმეს, ჩვენ დადგენილი გვყავს კონკრეტულად მკვლელობის ჩამდენი პიროვნება და უახლოეს დღეებში მივიღებთ ამ საქმეზე სამართლებრივ გადაწყვეტილებას".

19 მაისს, დაახლოებით 14:30 საათზე, ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა, ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა.