მას შემდეგ, რაც 1993 წელს თემურ ბაბლუანის ფილმს უძინართა მზე ვერცხლის დათვი გადაეცა, ბერლინის საერთაშორისო კინოფესტივალის მთავარ საკონკურსო პროგრამაში ქართული ფილმი აღარ უჩვენებიათ. თითქმის 30-წლიანი პაუზა წელს დასრულდება: ალექსანდრე კობერიძის სრულმეტრაჟიანი ფილმი რას ვხედავთ, როდესაც ცას ვუყურებთ? იმ თხუთმეტ კინოსურათს შორის მოხვდა, რომლებიდანაც წელს სპეციალური ჟიური საუკეთესოს დაასახელებს.

რამდენიმე დღის წინ ფილმის პირველი ტრეილერი გამოქვეყნდა:

ასევე ცნობილმა ონლაინგამოცემა Deadline-მა ფილმიდან წუთნახევრიანი ნაწყვეტი გაავრცელა, რომლის ხილვა ამ ბმულზე შეგიძლიათ.

სინოფსისის მიხედვით, რას ვხედავთ, როდესაც ცას ვუყურებთ? ლიზას და გიორგის სიყვარულის ისტორიას მოგვითხრობს, რომელიც ქალაქ ქუთაისში ვითარდება. სამსახიობო გუნდის წევრები გიორგი ბოჭორიშვილი, ანა ქარსელაძე, ოლიკო ბარბაქაძე, გიორგი ამბროლაძე და ვახტანგ ფანჩულიძე არიან.

ფილმი ქართულ-გერმანული პროექტია და სცენარის ავტორიც რეჟისორი ალექსანდრე კობერიძეა.

ბერლინალეს წლევანდელი, 71-ე ფესტივალის საკონკურსო პროგრამისთვის სულ 15 ფინალისტი შეირჩა და მათ შორისაა ცნობილი სამხრეთკორეელი რეჟისორის ჰონ სან სუს Introduction და თანამედროვე ფრანგი კინორეჟისორის სელინ შიამას Petite Maman. სრული სიის ხილვა შეგიძლიათ აქ.

აღსანიშნავია, რომ წლევანდელ ბერლინალეზე ასევე იქნება წარმოდგენილი კიდევ ერთი ქართველი რეჟისორის, სალომე ჯაშის დოკუმენტური ფილმი მოთვინიერება. ამ საერთაშორისო ფესტივალის ფარგლებში ფილმს აჩვენებენ სექციაში "ფორუმი".

პანდემიის გამო ბერლინის 71-ე საერთაშორისო კინოფესტივალი ჩვეული ფორმატით არ გაიმართება. 1-5 მარტს მოეწყობა ევროპული კინოს ვირტუალური ბაზრობა Industry Event, ხოლო 9-20 ივნისს ზაფხულის გამოშვების ფარგლებში ნაჩვენები იქნება ფესტივალის მიერ შერჩეული ფილმები.