თითქმის 30-წლიანი პაუზის შემდეგ ბერლინალეს მთავარ სელექციაში ქართული ფილმი მოხვდა: ალექსანდრე კობერიძის კინოსურათი რას ვხედავთ, როდესაც ცას ვუყურებთ? სხვა 14 საკონკურსო ნამუშევართან ერთად საუკეთესოს ტიტულის მოსაპოვებლად იბრძოლებს.

ბოლოს მთავარ საკონკურსო პროგრამაში ქართული ნამუშევარი 1993 წელს იყო წარდგენილი: თემურ ბაბლუანის ფილმი უძინართა მზე, რომელსაც მაშინ ვერცხლის დათვი გადაეცა.

საქართველოს ეროვნული კინოცენტრის ცნობით, ალექსანდრე კობერიძის ფილმი საქართველო-გერმანიის საერთო პროდუქციაა და მასში მთავარ როლებს გიორგი ბოჭორიშვილი, ანა ქარსელაძე, ოლიკო ბარბაქაძე, გიორგი ამბროლაძე და ვახტანგ ფანჩულიძე ასრულებენ.

წელს ბერლინალეს საკონკურსო პროგრამაში სულ 15 ფინალისტი შეირჩა და მათ შორისაა ცნობილი სამხრეთკორეელი რეჟისორის ჰონ სან სუს Introduction და თანამედროვე ფრანგი კინორეჟისორის სელინ შიამას Petite Maman. სრული სიის ხილვა შეგიძლიათ ამ ბმულზე.

აღსანიშნავია, რომ წლევანდელ ბერლინალეზე ასევე იქნება წარმოდგენილი კიდევ ერთი ქართველი რეჟისორის, სალომე ჯაშის დოკუმენტური ფილმი მოთვინიერება. ამ საერთაშორისო ფესტივალის ფარგლებში ფილმს აჩვენებენ სექციაში "ფორუმი".

პანდემიის გამო ბერლინის 71-ე საერთაშორისო კინოფესტივალი ჩვეული ფორმატით არ გაიმართება. 1-5 მარტს მოეწყობა ევროპული კინოს ვირტუალური ბაზრობა Industry Event, ხოლო 9-20 ივნისს ზაფხულის გამოშვების ფარგლებში ნაჩვენები იქნება ფესტივალის მიერ შერჩეული ფილმები.

შეგახსენებთ, რომ ბერლინის საერთაშორისო კინოფესტივალი მსოფლიოში ერთ-ერთი მთავარი კინომოვლენაა, რომელიც კანისა და ვენეციის კინოფესტივალებთან ერთად, ევროპის წამყვან კინოფესტივალთა სამეულში შედის.