პრემიერმინისტრობის კანდიდატი, ირაკლი ღარიბაშვილი ლიეტუვის პარლამენტის საგარეო ურთიერთობათა კომიტეტის თავმჯდომარეს, ჟიგიმანტას პავილიონისს, "ნაცმოძრაობასთან პირდაპირ დაკავშირებულს" უწოდებს.

"ყველასთვის მიუღებელია ის ფაქტი, რომ ნაცმოძრაობასთან პირდაპირ დაკავშირებული, ერთ-ერთი ქვეყნის, ჩვენი განსაკუთრებული გამორჩეული მეგობარი ქვეყნის პარლამენტის ერთ-ერთი კომიტეტის თავმჯდომარის ასეთი განცხადებები არის ყოვლად მიუღებელი, ბუნებრივია და მე მინდა შევუერთდე ბატონ მამუკას [მდინარაძის] პათოსს და აღვნიშნო, რომ ეს არის ყოვლად მიუღებელი სუვერენული, თავმოყვარე ქვეყნისთვის და მე მოვუწოდებ ამ ადამიანს და მის მეგობრებს დესტრუქციული ოპოზიციიდან, მაქსიმალურად მოკლე ვადაში დაამთავრონ ასეთი მიუღებელი განცხადებები", — ამბობს ღარიბაშვილი.

ჟიგიმანტას პავილიონისმა ტვიტერზე დაწერა, რომ ქართული ოცნების გარდა, დიალოგის კეთილი ნების შესახებ ყველა პოლიტიკურმა პარტიამ საჯაროდ განაცხადა. მან, ასევე, ამერიკის შეერთებული შტატების სახელმწიფო მდივან ენტონი ბლინკენს ნაციონალური მოძრაობის თავმჯდომარე ნიკა მელიას საქმისთვის ყურადღების გამახვილებისკენ მოუწოდა.

როგორც მამუკა მდინარაძემ სხდომის დაწყებამდე განაცხადა, ჟიგმანტის პავილიონისმა თქვა ფრაზა: "თქვენ უკვე დაკარგეთ ტერიტოირები და ახლა იმედსაც კარგავთ", რაც, მისი თქმით, მიუღებელია და ოკუპაცია ჩვენი ტკვილია. სინამდვილეში, პავილიონისმა ფრაზა ამ ფორმულირებით გააჟღერა: "თქვენ უკვე კარგავთ ტერიტორიებს, გინდათ, რომ მომავალიც დაკარგოთ?".