ქალთა ინიციატივების მხარდამჭერი ჯგუფის ინფორმაციით, 6 თებერვალს, თბილისში, ელბაქიძის აღმართის მიმდებარე ტერიტორიაზე მდებარე ერთ-ერთ ღამის კლუბში, ამ დრომდე დაუდგენელი პირები თავს დაესხნენ ოთხ ტრანსგენდერ ქალს.

ორგანიზაციის ცნობით, ძალადობის მსხვერპლებს სახისა და კიდურების დაზიანებები აქვთ, კერძოდ, ერთ მათგანს აქვს მოტეხილი ხელი, ორ ქალს აღენიშნება დაჟეჟილობები და ერთს ცხვირი აქვს დაზიანებული.

სამი დაზარალებულის ინტერესებს WISG-ის იურისტი ციალა რატიანი იცავს.

შინაგან საქმეთა სამინისტროში აცხადებენ, რომ 6 თებერვალს, დილის 07:20 საათზე, 112-ში შევიდა შეტყობინება, რომ თბილისში, ჯავახიშვილის ქუჩაზე, მოქალაქეებს შორის ჩხუბი მოხდა.

შსს-ს მიერ გავრცელებულ განცხადებაში წერია, რომ ადგილზე მისვლისას დაზარალებულებმა პოლიციასთან თანაშრომლობა და ვინაობის გამხელა არ ისურვეს:

"საუბარში მხოლოდ იმას აღნიშნავდნენ, რომ რამდენიმე მოქალაქემ ისინი ერთ-ერთ ღამის ბარში სცემა. მათ არ ისურვეს იმ ბარის დასახელება, სადაც ინციდენტი მოხდა".

უწყების განცხადებით, მათ საგამოძიებო მოქმედებების განსახორციელებლად განყოფილებაში წასვლაზე კატერგორიული უარი განაცხადეს და ტერიტორია დატოვეს, თუმცა შეტყობინებების შემდეგ, მეორე დღეს გამოცხადნენ განყოფილებაში.

შსს-მ გამოძიება სსჯ-ს 120-ე მუხლით, ჯანმრთელობის განზრახ მსუბუქი დაზიანების ფაქტზე დაიწყო.