სახელმწიფო აუდიტის სამსახურის თანახმად, მარტვილის მუნიციპალიტეტში 18 მეეზოვეს ზედამხედველობას 8 თანამშრომელი უწევს. ამის შესახებ მუნიციპალიტეტის 2018-2019 წლების საქმიანობის შესაბამისობის აუდიტშია საუბარი.

როგორც უწყებაში აღნიშნავენ, ა(ა)იპ მარტვილის კეთილმოწყობის ცენტრში, რომელიც პასუხისმგებელია დასუფთავების სამუშაოებზე, ვერ წარადგინა დასაბუთებული არგუმენტაცია, რატომ იყო საჭირო კოტროლისთვის ამდენი ადამიანი.

ანგარიშში ასევე ვკითხულობთ, რომ ორგანიზაციაში დასაქმებული იყო 6 მეველე, რომელთა ფუნქციას წარმოადგენდა ქალაქ მარტვილის ცენტრის დაცვა მოხეტიალე პირუტყვისაგან. თუმცა აუდიტის სამსახურში აღნიშნავენ, რომ აღნიშნული პირების მიერ მათზე დაკისრებული ფუნქციების შესრულება დოკუმენტურად არ დასტურდება.

"შესაბამისად, არსებობს რისკი, რომ ა(ა)იპ-ის საშტატო რიცხოვნობა ხელოვნურად არის გაზრდილი და მათი რაოდენობა არ შეესაბამება რეალურ საჭიროებას", — ნათქვამია ანგარიშში.

სახელმწიფო აუდიტის სამსახურის ინფორმაციით, 2018-19 წლებში მარტვილის მუნიციპალიტეტი მარტვილის კეთილმოწყობის ცენტრს სუბსიდიის მუხლით აფინანსებდა. ორგანიზაციაზე სუბსიდიის სახით 2018 წელს გაცემულია 499,9 ათასი ლარი, ხოლო 2019 წელს — 576,8 ათასი ლარი. როგორც ანგარიშშია აღნიშნული, მიღებული დაფინანსების 62% გახარჯულია დასაქმებული პირების შრომის ანაზღაურებაზე. წარმოდგენილი მონაცემებით, კომპანიაში 2018-2019 წლებში დასაქმებული იყო 73-80 პირი.

ამავე თემაზე: