ნავალნის მხარდასაჭერ აქციებზე სპეცრაზმელმა ჟურნალისტს სცემა. ფაქტის ამსახველი ვიდეო რუსულ მედიაში გავრცელდა.

რეპორტიორს პრესის ჟილეტი ეცვა და მოვლენებს იღებდა, როდესაც სპეცრაზმელმა მას თავში ხელკეტი ჩაარტყა.

TV Rain-თან დაზარალებულმა ჟურნალისტმა აღნიშნა, რომ სპეცრაზმელს უთხრა ვინც იყო, რის შემდეგაც მან შეაგინა და ხელკეტი ორჯერ ჩაარტყა. ეს ფაქტი ასახულია ნასტაიაშაია ვრემიას გავრცელებულ კადრებში.

ალექსეი ნავალნის სასამართლო პროცესის შემდეგ პროტესტმა ისევ იფეთქა. აქციებზე ისევ ათასობით ადამიანი გამოვიდა. TV Rain-ის ინფორმაციით, დააკავეს 500 ადამიანი.


რუსულმა სასამართლომ ალექსეი ნავალნის პატიმრობა მიუსაჯა. რუსული მედიების ინფორმაციით, ნავალნის სამ წელიწად-ნახევარი მიუსაჯეს. სასჯელს მოაკლდება 10 თვე, რომელიც მან შინაპატიმრობაში გაატარა და საპატიმრო დაწესებულებაში 2 წელი და 8 თვე იქნება.

სასამართლომ მიიჩნია, რომ ნავალნი პირობითი გათავისუფლების წესებს არღვევდა, ამიტომ დარჩენილი ვადა პატიმრობაზე შეუცვალა.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.