რუსი ოპოზიციონერის, ალექსეი ნავალნის სასამართლო პროცესის შემდეგ პროტესტმა ისევ იფეთქა. აქციებზე ისევ ათასობით ადამიანი გამოვიდა.

TV Rain-ის ინფორმაციით, აქციებზე 500 ადამიანი დააკავეს. სოციალურ ქსელებში ვრცელდება კადრები, რომლებშიც ჩანს, რომ სამართალდამცავები მოქალაქეებს სცემენ.

რუსულმა სასამართლომ ალექსეი ნავალნის პატიმრობა მიუსაჯა. რუსული მედიების ინფორმაციით, ნავალნის სამ წელიწად-ნახევარი მიუსაჯეს. სასჯელს მოაკლდება 10 თვე, რომელიც მან შინაპატიმრობაში გაატარა და საპატიმრო დაწესებულებაში 2 წელი და 8 თვე იქნება.

სასამართლომ მიიჩნია, რომ ნავალნი პირობითი გათავისუფლების წესებს არღვევდა, ამიტომ დარჩენილი ვადა პატიმრობაზე შეუცვალა.

ალექსეი ნავალნი მოსკოვის აეროპორტში 17 იანვარს დააკავეს, როცა ის გერმანიიდან ბრუნდებოდა, სადაც ნოვიჩოკით მოწამვლის შემდეგ მკურნალობდა. დაკავებიდან მეორე დღეს პოლიციის განყოფილებაში გამართულ სასამართლო პროცესზე მას 30-დღიანი პატიმრობა შეუფარდეს.

11 იანვარს რუსეთში სასჯელის აღსრულების ფედერალურმა ბიურომ სასამართლოს მიმართა, რომ ნავალნის პირობითი მსჯავრი, რომელიც მან ივ როშეს საქმეზე მიიღო, რეალურით ჩანაცვლდეს. ამასთან, რუსეთში ოპოზიციონერის წინააღმდეგ თაღლითობის მუხლით საქმე აღძრეს. საგამოძიებო უწყებები მას საკუთარი ფონდებიდან ფულის გაფლანგავს ედავებიან.